Qazaqstandyqtardyń basym bóligi jumysqa qabyldaný barysynda ashyq kemsitýge ushyrap otyr - T. Ómirzaqov
ASTANA. 13 naýryz. QazAqparat - Qazaqstandyqtardyń basym bóligi jumysqa qabyldaný barysynda ashyq kemsitýge ushyrap otyr. Búgin Qazaqstan Respýblıkasy Parlamenti Májilisiniń jalpy otyrysynda depýtat Tursynbek Ómirzaqov Qazaqstan Respýblıkasynyń Eńbek jáne halyqty áleýmettik qorǵaý mınıstri Serik Ábdenovke depýtattyq saýal joldap, osy máseleni kóterdi.
«Áleýmettik jańǵyrtý jaǵdaıynda áleýmettik eńbek qatynastarynyń tıimdi modelin qalyptastyrý máselesi ózekti bolyp tabylady. Konstıtýtsııaǵa sáıkes árbir qazaqstandyqtyń eńbek etý bostandyǵyna quqyǵy bar. Al Eńbek Kodeksi boıynsha eshkimdi de óziniń eńbek quqyqtaryn iske asyrý kezinde jynysyna, jasyna, dene kemistikterine, násiline, ultyna, tiline, múliktik, áleýmettik jáne laýazymdyq jaǵdaıyna jáne kez-kelgen ózge jaǵdaıattar boıynsha eshqandaı kemsitýge bolmaıdy. Alaıda atalǵan demokratııalyq qaǵıdat tájirıbe júzinde júzege asyrylmaıdy», - deıdi T. Ómirzaqov.
Onyń aıtýynsha, kóptegen qazaqstandyqtar jumysqa qabyldaý barysynda ashyq kemsitýge tap bolady. Máselen, kóp jaǵdaıda jumys berýshiler jumysshy jasyna shekteý qoıyp, jas jáne tájirıbeli mamandardy irikteýge tyrysady.
«Zańnama júzinde tyıym salynǵanyna qaramastan, bizdiń qoǵamda qart adamdardy jumysqa alýda keri kózqaras tamyr jaıyp keledi. Bul shyn mánisinde ómirlik kúsh-qýatqa toly qart adamdardyń moraldyq ahýalyna keri áserin tıgizedi. Halyqaralyq eńbek uıymy egde adamdar eńbeginiń ónimdiligi tómen degen pikirdi áldeneshe ret joqqa shyǵardy. Sonymen qatar tájirıbesi joq jastar da kemsitiledi, bul túpki nátıjesinde olardy eń tıimsiz jaǵdaılarda kez-kelgen jumysqa kelisýge májbúrleıdi», - deıdi depýtat.
Bul rette T. Ómirzaqov azamattardy jumysqa alý barysynda kemsitý faktileriniń jolyn kesý boıynsha jumysty kúsheıtý qajettigin alǵa tartady. «Eń bastysy jas shekteýleri qoıylǵan jumysqa qabyldaý týraly habarlamalardy BAQ-ta jarııalaýǵa tikeleı tyıym salý qajet. Bul jumysshylardy kemsitkeni úshin jumys berýshilerdi jaýapkershilikke tartýdy ońaılatýǵa jáne qoǵamdyq sanada jasyna baılanysty kemsitýshilikke degen keri qabyldaýdy pysyqtaýǵa múmkindik beredi», - deıdi ol.
