Qazaqstandyqtardyń basym bóligi óz óńirlerindegi emhanalarda emdelgendi jón kóredi
yrkúıektiń 10-y. QazAqparat /Ernur Aqanbaı/ - 2010 jyly engizilgen Biryńǵaı ulttyq densaýlyq saqtaý júıesiniń aıasynda emhanany tańdaý erkindigi engizilgennen keıin qazaqstandyqtardyń basym bóligi óz óńirlerindegi emhanalarda emdelgendi jón kórip otyr. Bul týraly búgin Astanada «Bnews.kz» portalynda ótken onlaın konferentsııada QR Densaýlyq saqtaý vıtse-mınıstri Salıdat Qaıyrbekova aıtty.
Onyń sózine qaraǵanda, atalmysh júıe jumys isteı bastaǵan segiz aıda elimizdegi naýqastardyń emhanalardy nemese dárihanalardy tańdaý quqyǵy qamtamasyz etilip otyr. Deıturǵanmen, naýqastardyń shamamen 90 paıyzǵa jýyǵy ózderi turǵan óńirlerde emdelgendi jón kóredi. Qalǵandary Astanadaǵy, Almatydaǵy jáne Qaraǵandy oblysyndaǵy emhanalardy tańdaǵan.
S. Qaıyrbekova naýqastar negizinen ózderi turatyn jerge jaqyn iri qalalarda emdelgendi qalaıtyndaryn atap kórsetti. Máselen, Aqmola oblysyna jaqyn ornalasqan Soltústik Qazaqstan oblysy aýdandarynyń turǵyndary kóbinese Kókshetaýdaǵy emhanalarǵa baryp emdelgendi qalaıdy. Sebebi, bul halyqqa óte yńǵaıly. «Birinshi jarty jyldyqtyń qorytyndysy boıynsha mynany aıtýǵa bolady: Biryńǵaı ulttyq densaýlyq saqtaý júıesiniń negizgi qaǵıdattary, sonyń ishinde usynylatyn medıtsınalyq qyzmetterdiń ashyqtyǵy jáne emdeletin oryndy tańdaý erkindigi saqtalyp otyr. Búginde atalmysh júıe aıasynda patsıentter emdeletin emhanany ózderi tańdaı alady», dedi ol.
