Qazaqstandyqtardyń basym bóligi eski kólik minedi
ASTANA. QazAqparat - Qańtar aıynda Qazaqstanda 88 myńnan astam avtokólik tirikeýge qoıyldy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«2018 jyldyń qańtarynda ákimshilik polıtsııa organdary tirkeýge 88 551 avtokólikti qoıyldy. Atalǵan kórsetkish ótken jyldyń sáıkes kezeńinen 12,2 paıyzǵa artyq. Onyń ishinde 83 013-i ekinshi ret tirkelgender úlesinde, ıaǵnı bir adamnan ekinshi adamnyń atyna aýystyrylǵan kólikter sanatyna jatqyzyldy. Ósim 2017 jylmen salystyrǵanda 11,1 paıyzǵa jetti. Al alǵash ret tirkelgen kólik quraldarynyń sany 4 538-di qurady. Ol byltyrǵa qaraǵanda, 36,6 paıyzǵa joǵary boldy», - dep atap ótilgen taratylǵan málimette.
«QazAvtoÓnerkásiptiń» habarlaýynsha, bıyl qaıta tirkelgen kólikterdiń úshten ekisin (68,2 paıyzy) paıdalaný merzimi 10 jyldan asqan kólikter qamtyǵan.
Onyń ishinde 20 jyldan asqandardyń úlesi 32 009 (38,1 paıyz) bolsa, 11-den 20 jylǵa deıingiler 30,1 paıyzdy qurady.
Al 4-ten 7 jylǵa deıin - 17 895 (21,3 paıyz), 8-den 10 jylǵa deıin - 4 909 (5,8 paıyz), 1-den 3 jylǵa deıingi kólikter sany 2 760-qa jetti. Sonymen qatar paıdalaný merzimi 1 jylǵa jetpegen kólikterdiń úlesi 1 178 boldy.
«Statıstıka kórsetip otyrǵandaı, otandyq avtoparktiń eskirýiniń turaqty úrdisi baıqalýda. Osy oraıda naryqta 20 jyldan asqan kólikti qaıta satý kórsetkishi 34,9 paıyzdan 38,1 paıyzǵa deıin ósken. Al paıdalaný merzimi 1-3 jyl aralyǵyndaǵy avtokólikter 7,7 paıyzdan 3,3 paıyzǵa deıin qysqardy», - delingen taratylǵan málimette.
