Qazaqstandyqtardyń basym bóligi dári-dármekti jarnamaǵa senip satyp alady
ASTANA. QazAqparat - Qazaqstanda árbir ekinshi adam dári-dármekti «kórshisiniń keńesine» ne bolmasa jarnamaǵa senip satyp alady. Búgin Májilistegi Úkimet saǵatynda Densaýlyq saqtaý mınıstri Salıdat Qaıyrbekova osylaı málimdedi.
«Qazirgi kezde biz áleýmettik tekserý júrgizip biraz jaıtty anyqtadyq. Atap aıtqanda, elimizdegi árbir tórtinshi qazaqstandyqtyń antıbıotıkterdi baqylaýsyz qabyldaıtyny, al árbir ekinshi adamnyń dári-dármekti jarnama nemese kórshisiniń keńesi boıynsha satyp alatyny belgili boldy», - dedi mınıstr.
Vedomstvo basshysynyń aıtýynsha, halyqtyń dári-dármekke qatysty saýatyn arttyrý maqsatynda óńirlerde aqparattyq-saraptamalyq ortalyq qurylǵan. Osy ortalyqqa byltyrdyń ózinde 26 myńnan astam azamat habarlasqan.
