Qazaqstandyqtardyń 93 paıyzy prokýratýraǵa tamyr-tanyssyz ornalasý múmkin emes dep sanaıdy

ASTANA. QazAqparat - Saýalnamaǵa qatysqan 7 500 adamnyń 93 paıyzy prorkýratýraǵa tamyr-tanyssyz ornalasý múmkin emes dep sanaıdy. Keshe «Prokýratýraǵa úzdik kadrlar!» dep atalatyn dóńgelek ústel barysynda QR Bas prokýrory Jaqyp Asanov osylaı málim etti.

«Bir apta buryn ınternette «Prokýratýraǵa tanyssyz ornalasýǵa bola ma?» degen saýalnama jarııaladyq. Nátıjesi tań qaldyrdy. 7 500 adam jaýap bergen. 7 myńy, ıaǵnı 93 paıyzy múmkin emes dese, tek 500-i ǵana múmkin dep otyr. Olar optımıster sııaqty. Bul da jaqsy», - dedi J.Asanov.

Onyń atap ótýinshe, dál osyndaı saýal elimizdiń 3 joǵary oqý oryndarynda júrgizilgen. Saýalǵa jaýap bergen 480 stýdenttiń tek 45-i ǵana, ıaǵnı 10 paıyzǵa jetpeıtini prokýratýraǵa óz kúshińmen ornalasýǵa bolady, dep sanaıtyndyqtaryn bildirgen. Al qalǵandary tamyr-tanys arqyly ǵana prokýratýra organdaryna jumysqa ornalasýǵa bolatyndyǵyn aıtqan.

«Bul eski, kónergen paradıgma. Sonaý keńes zamanynan 2013 jylǵa deıin eshqandaı konkýrs bolǵan joq. Zańger dıplomy bolsa jetkilikti boldy. Oblys prokýrorynyń kóńilinen shyqsań bolǵany jumysqa qabyldaıdy. Biraq, ádildik úshin aıta keteıin, keńes ýaqytynda munshama kóp zańger  bilim alyp shyqqan joq. Ol kezde QazMÝ men QarMÝ ýnıversıtetterin ary ketse 500 maman bitirip shyǵatyn. Buǵan qosa olardyń sapasy da óte joǵary edi», - dedi Bas prokýror.

Osy oraıda ol 2013 jyly prokýratýraǵa jumysqa ornalasýda konkýrstan ótý engizilgenimen, tanys-tamyr arqyly qabyldaý jalǵasyp kele jatqandyǵyn basa atap ótti.