Qazaqstandyqtardyń 87,7 paıyzy sherýlerdi qalamaıdy - Saýalnama

NUR-SULTAN. QazAqparat - Arnaıy júrgizilgen saýalnamaǵa qatysqan qazaqstandyqtardyń 87,7 paıyzy sherýge shyǵýdy qalamaıtyndyqtaryn bildirdi. Bul týraly QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Memleket basshysy 2019 jylǵy 2 qyrkúıektegi Qazaqstan halqyna Joldaýynda Úkimet aldyna mıtıngiler týraly zańnamany jetildirý jóninde naqty mindet qoıdy. Osyǵan sáıkes, Aqparat jáne qoǵamdyq damý mınıstrligimen «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» jáne «Qazaqstan Respýblıkasynyń keıbir zańnamalyq aktilerine beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrýlar engizý týraly» zań jobalary ázirlendi. Zań jobalary «Ashyq málimetter» portalyna jarııalanǵan sátten bastap azamattardan 261 pikir tústi. Qazaqstannyń 9 qalasynda tyńdaýlar ótti» , - dedi Májiliste atalǵan zań jobalaryn tanystyrǵan mınıstr.

Onyń atap ótýinshe, Qazaqstanda tirkelgen halyqaralyq uıymdar men dıplomatııalyq ókildikterdiń ókilderi úshin de zań jobasynyń jeke tanystyrylymy ótkizildi. Sondaı-aq qoǵamdyq, onyń ishinde áleýmettik jelilerdegi pikirler zerdelenip, áleýmettik zertteýler júrgizildi.

«Qarama-qarsy pikirler óte kóp. Bizge, ókiletti memlekettik organ retinde barlyq múddeli taraptardyń qajettiligin qanaǵattandyratyn teńgerim tabý ońaıǵa túsken joq. Konrad Adenaýer atyndaǵy nemis qorynyń qoldaýymen DEMOSCOPE qoǵamdyq pikirdi jedel monıtorıngileý bıýrosy eldiń búkil óńirinde qazaqstandyqtarǵa saýalnama júrgizdi. Onyń nátıjesi respondentterdiń 40 paıyzy mıtıngter eldegi jaǵdaıdy tek turaqsyzdandyrady dep sanaıtyndyǵyn kórsetti. Olardyń 43 paıyzy mıtıng ótkizýdi bılikpen kelisý qajet dep esepteıdi«, - dedi Dáýren Abaev.

Mınıstrdiń aıtýynsha, Qazaqstannyń qoǵamdyq damý ınstıtýty júrgizgen áleýmettik saýalnama barysynda oǵan qatysqan qazaqstandyqtardyń 87,7 paıyzy sherýge shyqqylary kelmeıtindikterin aıtqan.

»Aqparat jáne qoǵamdyq damý mınıstrligi júrgizgen áleýmettik saýalnama saýal alynǵan qazaqstandyqtardyń 53,7 paıyzy jınalys ótkizýge ruqsat alý jınalysty ótkizýshiler úshin mindetti bolýy tıis dep sanaıtyndyǵyn kórsetti. Bul rette respondentterdiń 21,4 paıyzy ǵana Qazaqstanda ótetin mıtıngterge oń qaraıdy«,- dedi Dáýren Abaev.