Qazaqstandyqtardyń 73 paıyzy otbasyn ómirdiń máni sanaıdy - zertteý
«Siz úshin otbasy neni bildiredi?» degen suraqqa, suralǵan qazaqstandyqtardyń jalpy sanynyń 73,1% otbasyn ómirdiń máni retinde sanaıtynyn jaýap berdi. Sondaı-aq tanymal jaýaptar: 39% – «áýlettiń erteńi», 29% – «baqyt pen mahabbat», 16,9% – «jaýapkershilik pen mindettemeler», 7,9% – «qoǵamnyń negizi» jáne 1,6% – «jalǵyzdyqtan qutqarý» dep jaýap berdi.
Bul rette genderlik pikir turǵysy bylaı qurylǵan: áıelderdiń 75,1% jáne erlerdiń 51,3% otbasyn áýlettiń erteńi dep sanaıdy.
«Ata-analardyń 69,3% «kópbalaly bolǵyńyz keldi me?» degen suraqqa, «Iıa, men árqashan kópbalaly bolǵym keldi» dep jaýap berdi. Suralǵan myńdaǵan respondentterdiń 65,2% tórt balany tárbıeleýde, 34,8% – bes jáne odan da kóp balany tárbıeleýde», - dep atap ótti otbasy ınstıtýtyn zertteý ortalyǵynyń jetekshisi Juldyz Battalova.
Saýalnama málimetteri boıynsha, otbasylyq juptardyń kópshiligi (78,9%) ózderiniń otbasylyq qarym-qatynasyn «óte jaqsy, biz bir-birimizdi súıemiz jáne qurmetteımiz» dep baǵalady.
Zertteý sondaı-aq, kóptegen adamdardyń pikirinshe, otbasylyq qatynastardy nyǵaıtatyn mańyzdy sapa mahabbattan góri qurmet ekenin kórsetti. Suralǵandardyń 68,2% osylaı sanaıdy. Sondaı-aq, otbasylyq respondentter arasynda 90,2%-y ómirine rıza ekendigin atap ótti, bul rette ajyrasqan adamdardyń arasynda ómirine rızalar - 73,9% .
«70,4% balalardy tárbıeleýde kúsh qoldanýǵa teris qaraıdy, bul oryndy emes jáne durys emes dep sanaıdy. Qazaqstandyq ata-analar ózara túsinistik, qurmet, mahabbat sııaqty emotsıonaldyq faktorlarǵa kóńil bóledi», - deıdi Juldyz Battalova.
Aıta ketý kerek, bul zertteý Qazaqstanda alǵash ret ótkizildi. Zertteý qorytyndysy boıynsha osy máselege múddeli memlekettik organdar men basqa da uıymdar úshin usynymdar ázirlenedi.
