Qazaqstandyqtardyń 73,5 %-y bala týýdy josparlaý qajet dep sanaıdy – saýalnama
«Qazaqstandyq otbasylar - 2022» ulttyq baıandamasynyń maqsaty – otbasy ınstıtýty salasyndaǵy negizgi máseleler men trendterdi anyqtaý jáne QR otbasy ınstıtýtyn jetildirý úshin praktıkalyq usynystar ázirleý. Baıandama negizinen 4 taraýdan turady. Olardyń árqaısysynda birneshe bólimder bar. Birinshi bólimde elimizdegi otbasy saıasatyn júzege asyrý protsesine taldaý jasalyp, onyń zańnamalyq jáne ınstıtýtsıonaldyq aspektileri zertteldi. Ekinshi bólimin áleýmettik az qamtylǵan otbasylardy memlekettik-áleýmettik qoldaý máselelerine arnaldy. Úshinshi bólimi otbasylardaǵy ata-ana áleýetin qalyptastyrý jáne bala tárbıesiniń erekshelikterin zertteýge arnalǵan. Al ulttyq baıandamanyń tórtinshi taraýynda alǵash ret sybaılas jemqorlyqtyń aldyn alý jáne oǵan qarsy kúreske áıelder men otbasy ınstıtýtynyń yqpaly týraly máseleniń qarastyrylýyn atap ótken jón. Sondaı-aq baıandama aıasynda alǵash ret Qazaqstandaǵy áke ınstıtýty jan-jaqty qarastyryldy», - dep toqtaldy Nurbek Matjanı.
Sonymen birge ol baıandamany ázirleý barysynda júrgizilgen zertteý jumystarynyń nátıjelerine toqtaldy.
«Áýeli halyqtyń azamattyq nekege degen kózqarasy týraly zerteýlerge toqtalsam. Ortasha alǵanda barlyq jastaǵy adamdardyń shamamen 25 %-y azamattyq nekege oń kózqaras tanytty. Al saýalnamaǵa qatysqandardyń 30%-dan astamy beıtarap ustanymda. Qoldamaıtyndardyń úlesi - 32,8 %. Bala týýdy josparlaý boıynsha saýalnamaǵa qatysqan qazaqstandyqtardyń 73,5 %-y bala týýdy josparlaý qajet dep sanaıdy. Al 15,2 %-y josparlaýdyń qajeti joq dep eseptese, 11,3 %-y bul suraqqa jaýap bere almady», - dep túıindedi Nurbek Matjanı.
Onyń aıtýynsha, ulttyq baıandamany daıyndaý barysynda osyǵan deıingi zertteý derekteri saraptalyp, respondenttermen saýalnama jáne suhbattar júrgizilgen.
