Qazaqstandyqtardyń 67 paıyzy baqytty otbasyn qura alǵan – saýalnama
NUR-SULTAN. QazAqparat – QR Prezıdenti janyndaǵy Qazaqstan strategııalyq zertteýler ınstıtýty turǵyndardyń otbasyn qurý týraly saýalnama suraqtaryna bergen jaýabyn usyndy, dep habarlaıdy QazAqparat.
Saýalnama respýblıkalyq mańyzy bar Z qala jáne 14 oblystaǵy 59 qalalyq eldimeken jáne aýyldyq jerlerde ótken.
Onda 18 jastaǵy jáne odan asqan 2000 respondent «Siz baqytty otbasyn qura aldyńyz ba?» degen suraqqa jaýap bergen.
«Lev Tolstoıdyń «Óz úıinde baqytty adam – eń baqytty» degen naqyl sózin eskerip, qazaqstandyqtardyń jartysynan astamyn osyndaı sanatqa jatqyzýǵa bolatynyn atap ótemiz. Respýblıkalyq saýalnama barysynda respondentterdiń 67,7% baqytty otbasyn qura alǵanyn málimdedi. Al taǵy 24,1% áli baqytty otbasyn qurmaǵan, biraq oǵan qol jetkize alatynyna senimdi. Baqytty otbasy qura alatynyna kúmándanatyndardyń úlesi – 3,8%» dep habarlady ınstıtýt.
Aıta keteıik, 15 mamyr – halyqaralyq otbasy kúni . Ataýly data 1993 jyldan bastap BUU Bas Assambleıasynyń qararyna sáıkes atap ótiledi.
