Qazaqstandyqtardyń 60 paıyzy jemqorlyqqa qarsy kúreste kómek kórsetýge daıyn

NUR-SULTAN. QazAqparat – Arnaıy saýalnamaǵa qatysqan qazaqstandyqtardyń 60%-dan astamy sybaılas jemqorlyqqa qarsy kúreste kómek kórsetýge daıyn ekendigin bildirgen. Bul týraly «Transparency Kazakhstan» QQ atqarýshy dırektory Olga Shııan Ortalyq kommýnıkatsııalar qyzmetinde ótken brıfıngte aıtty, dep habarlaıdy QazAqparat tilshisi.

«Zertteýge 200-ge jýyq áleýmettanýshy men 12 taldaýshy qatysty. Olar osy kúzde respýblıkalyq mańyzy bar 3 qalada, 14 oblys jáne 143 aýdan ortalyǵynda saýalnama júrgizdi. Ádisteme Transparency International-diń eki jahandyq zertteýine – turǵyndardyń sybaılas jemqorlyq tájirıbesin ólsheıtin álemdik sybaılas jemqorlyq barometri men qoǵamdyq dıskýrstaǵy sybaılas jemqorlyq taqyrybynyń ózektiligin baǵalaıtyn sybaılas jemqorlyqty qabyldaý ındeksine negizdelgen», - dep atap ótti Olga Shııan.

Onyń aıtýynsha azamattardyń 37,4%-y jáne kásipkerlerdiń 45,9%-y sońǵy jyly sybaılas jemqorlyqtyń tómendegenin kórsetti. Respondentterdiń 11,3%-y memlekettik organdarǵa júgingen kezde turmystyq sybaılas jemqorlyqqa tap bolǵan (2019 jyly 13,4%). ShOB ókilderiniń 8,2%-y memlekettik organdarǵa júgingen kezde máseleni beıresmı jolmen sheshý qajettiligine tap bolǵan (2019 jyly 9,2%).

«Bıznes-qoǵamdastyqtaǵy jaǵymdy kórinisti atap ótken jón: suralǵan kásipkerlerdiń 80%-dan astamy Qazaqstanda para bermeı-aq, tek quqyqtyq salada jumys isteı otyryp, óz bıznesin damytýǵa ábden bolady dep esepteıdi. Azamattar men bıznes-qoǵamdastyqtardyń pikirinshe, Prezıdent (70%), Sybaılas jemqorlyqqa qarsy is-qımyl agenttigi (63% jáne 65%), Úkimet (59% jáne 62%), Memlekettik qyzmet isteri agenttigi (55% jáne 59%) jáne «Nur Otan» partııasy (53% jáne 55%) barynsha senimge Saýalnamaǵa qatysqan qazaqstandyqtardyń 60%-dan astamy sybaılas jemqorlyqqa qarsy kúreste kómek kórsetýge daıyn ekendigin jetkizdi», - deıdi ol.