Qazaqstandyqtardyń 60 paıyzy dárigerge qaralýǵa ýaqyt tappaıdy
ASTANA. 17 qazan. QazAqparat - Bul týraly baspasóz máslıhaty kezinde Dári-dármek aqparattyq-taldaý ortalyǵynyń baspasóz hatshysy Nazerke Ibraımova málimdedi.
«Qazaqstan Respýblıkasy turǵyndarynyń dárilik zattardy qoldanýyn anyqtaý maqsatynda bıyl 10 tamyzdan 3 qyrkúıek aralyǵynda saýalnama júrgizildi. Saýalnama nátıjesinde belgili bolǵandaı, otandastarymyzdyń 50 paıyzy antıbıotıkterdi dárigerdiń taǵaıyndaýynsyz qabyldaıtyn bolyp shyqty», - dedi N. Ibraımova.
Onyń aıtýynsha, kóbine sýyq tııý jáne tumaý kezinde, asqorytý buzylǵan kezde, jótel jáne basqa da tynys alý júıesi dertke shaldyqqanda, sondaı-aq ártúrli etıologııalyq aýrýlar kezinde respondentterdiń 70 paıyzy dárigerdiń taǵaıyndaýynsyz ártúrli dárilerdi qabyldaıdy.
«Bul rette adamdardyń 60 paıyzy dárigerdiń qabyldaýyna barýǵa ýaqyttyń tapshylyǵyn mysalǵa keltirse, 14 paıyzy ózin ózi emdeý máselelerine jetkilikti saýattymyz dep esepteıdi», - deıdi ol.
Aıta ketý kerek, saýalnamany QR Prezıdenti Nursultan Nazarbaevtyń «Qazaqstannyń áleýmettik jańǵyrtylýy» maqalasynda berilgen halyqtyń dárilik saýattylyǵyn arttyrý maqsatynda QR Densaýlyq saqtaý mınıstrligi júrgizgen. Oǵan elimizdiń barlyq oblystarynan 1623 adam qatysty.
