Qazaqstandyqtardyń 45 paıyzy temekige qarsy kúreske baǵyttalǵan qarjy tıimsiz jumsalyp jatyr dep sanaıdy

Saýalnamaǵa qatysqandardyń 42 paıyzy bolsa, bul qarjyny kerisinshe áleýmettik máselelerdi sheshýge jumsaý kerektigin alǵa tartqan. Jaýap bergenderdiń tek 9 paıyzy ǵana qarjynyń maqsatty jumsalatyndyǵyn jáne bul sharalar temeki tartatyndardyń sanyn azaıtýǵa septigin tıgizip jatqandyǵyn moıyndaǵan.

«MRG» agenttigi qazaqstandyqtar arasynda júrgizilgen saýalnama barysynda osyndaı derekterge qol jetkizdi. Bul shara 31 mamyrda ótkiziletin Dúnıejúzilik temekisiz kún qarsańyna qaraı arnaıy ótkizilip otyr.

Bul jerde saýalnamaǵa jaýap bergenderdiń 46 paıyzynyń pikirinshe, sport sektsııalary kóptep ashylýy tıis jáne temeki tartýdyń zııandylyǵy týraly úgit-nasıhat jumystary jan-jaqty júrgizilýi kerek. Sonda ǵana mundaı zııandy ádetpen tıimdi túrde kúresýge bolady. Qatysýshylardyń tórtten biri temekige degen áýestikti jeńý múmkin emestigin moıyndaýda.

Saýalnamaǵa qatysqandardyń 16 paıyzy temeki tartýǵa qarsy kúrestiń tıimdi júrgiziletindigin, al qolǵa alynǵan sharalardyń temeki tartýshylarǵa zııandy ádetten arylýǵa kómektesip jatqandyǵyn aıtqan. Al 83 paıyzy bolsa, kerisinshe «qoldanylyp jatqan sharalar tıimsiz (35%) nemese ústirt qana júzege asyrylyp jatyr» (48%) degen pikirde.

Qazir qolǵa alynyp jatqan sharalardyń biri - temeki qoraptaryndaǵy eskertpe sýretter ekeni belgili. Biraq saýalnamaǵa jaýap bergenderdiń 75 paıyzy: «temekige qumarlar olarǵa áldeqashan úırenip ketken, ıaǵnı nazar aýdarmaıdy» - degen oıda. Jaýap bergenderdiń 16 paıyzy tanystarynyń osy sýretterdiń sebebinen temekini qoıyp ketkenderin jetkizgen.

Saýalnamaǵa Astana men Almaty qalalarynyń jasy 18-den joǵary 780 turǵyny qatysqan. Olardyń ishinde 194 adam temeki shegetinder, shekpeıtinder - 586. Saýalnama ústimizdegi jyldyń 21-24 mamyry aralyǵynda telefon arqyly suraq qoıý boıynsha alyndy.