Qazaqstandyqtardyń 30 paıyzǵa jýyǵy buqaralyq sportpen qamtylýy shart - Memleket basshysy
A. Qańtardyń 29-y. QazAqparat /Qanat Mámetqazyuly/ - Qazaqstandyqtardyń 30 paıyzǵa jýyǵy buqaralyq sportpen qamtylýy shart.
Búgin QR Parlamenti palatalarynyń birlesken otyrysynda Qazaqstan halqyna Joldaýyn jarııalaǵan QR Prezıdenti Nursultan Nazarbaev osylaı málim etti, dep habarlaıdy QazAqparat.
«Halyq densaýlyǵy - Qazaqstannyń strategııalyq maqsattaryna qol jetkizýdegi ajyramas jetistikteriniń biri. Qazirgi tańda biz nátıjege baǵdarlanǵan medıtsınalyq qyzmetterdi tóleý júıesin engizgeli otyrmyz. Dárilerge qatysty barlyq bazalyq sharalar qamtamasyz etildi. Dárilerdiń 50 paıyzǵa jýyǵyn óz elimizde shyǵaramyz degen maqsat ta bar. Jalpy, densaýlyq saqtaý salasynyń basty memlekettik saıasaty - salaýatty ómir salty, azamattyń óz densaýlyǵy úshin salıqaly jaýapkershiliginiń bolýyna negizdelýi shart. Sonymen birge, 2011 jylǵy Azıada oıyndaryna daıyndap jatqan sporttyq ınfraqurylymdar buqaralyq sportty damytýǵa qajetti alǵyshart bola alady, bul rette óńirler de Astana men Almatydan qalyspaýy tıis», dedi N. Nazarbaev.
Sonymen birge, Elbasy respýblıka óńirlerinde bul maqsatta túrli sharalar atqarylǵanyn, biraq bunyń áli de jetkiliksiz ekendigin atap ótti. «Sport jáne týrızm mınıstrligi tek halyqaralyq sporttyq sharalarmen, olımpıada chempıondaryn daıyndaý isimen ǵana aınalysyp otyra bermeı, eń basty shara retinde buqaralyq sportty da damytýy kerek. Qazaqstandyqtardyń 30 paıyzǵa jýyǵy buqaralyq sportpen qamtylýy shart. Tek osyndaı jaǵdaıda ǵana biz ilgerileýshilikti baıqaımyz. Bul jalpy Úkimetke júktelgen mindet», dedi N. Nazarbaev.
