Qazaqstandyqtardyń 13 paıyzy keń jolaqty ınternetti paıdalana alady
ASTANA. QazAqparat - Qazaqstanda árbir 100 adamnyń 13-ine keń jolaqty joǵary jyldamdyqty jeli baılanysy qoljetimdi. Abonentter sany bir jylda 12% kóbeıgen, dep habarlaıdy energyprom.kz.
2017 jyldyń qańtar-naýryz aılarynda telekommýnıkatsııalyq kompanııalar qazaqstandyqtarǵa 55,45 mlrd teńgege ınternet-baılanys qyzmetterin kórsetken - bul bir jyl burynǵy kezeńmen salystyrǵanda 9,5% kóbirek. Joǵary ósimder Astanada, Almatyda jáne Pavlodar oblysynda tirkeldi. Bul ınternet-jeliniń keńeıýimen tikeleı baılanysty: bir jylda abonentter sany 11,6%-ǵa, ıaǵnı 2,4 mıllıon adamǵa deıin ósken. Eń joǵary ósimder Astana men Almaty oblysynda tirkeldi. Internet naryǵynyń negizgi damýy qalalarda baıqaldy. Aýyldyq jerlerde kórsetilgen web-baılanys qyzmetteriniń kólemi bir jylda 3,4% -ǵa, qalalarda - 10,1% ulǵaıǵan. Aýyl barlyq ınternet-qyzmet kóleminiń 8,1% ǵana quraıdy (bir jyl buryn 8,6% edi). Bul oraıda ınternet-baılanystyń aýyldyq jerlerde damýyndaǵy negizgi qozǵaýshy bolyp qalatynyn jáne jalpy baılanys kóleminiń 42% quraıtynyn atap ótken jón (bir jyl buryn 40,6% bolǵan).
Qazaqstan boıynsha árbir 100 turǵynnyń 13-ine, aýyldarda -100 adamnyń 6-yna keń jolaqty tirkelgen joǵary jyldamdyqty ınternet qoljetimdi. Internettendirýdiń úzdik kórsetkishteri: Almatyda árbir ekinshi turǵyn, Astanada 100 adamnyń 17-si, Soltústik Qazaqstan oblysynda - 100 adamnyń 16-sy jáne Pavlodar men Aqmola oblystarynda - 100 adamnyń 11-i tirkelgen joǵary jyldamdyqty web-baılanysty qoldana alady.
