Qazaqstandyqtardy úlken ózgerister kútip tur – Prezıdent

NUR-SULTAN. QazAqparat – QR Prezıdenti Qasym-Jomart Toqaev referendýmda daýys bergennen keıin qazaqstandyqtardy úlken ózgerister kútip turǵanyn aıtty, dep habarlaıdy QazAqparat tilshisi.

«Alda úlken jumys bar. Búgin ózgerister engizýge daýys berip jatqan Konstıtýtsııany iske asyrý kerek. Atap aıtsaq, partııalarǵa, Parlamentke qatysy bar zańnamalarǵa ózgeris engizilmek. Parlamentimiz bul mindetti abyroımen atqarady dep oılaımyn», - dedi Memleket basshysy.

Prezıdent Qazaqstan halqy daýys berip jatqan túzetýler eldiń qoǵamdyq ómirine úlken ózgerister engizýdi kózdeıtinin atap ótti.

«Túptep kelgende memleket pen qoǵamnyń arasyndaǵy qatynastyń paradıgmasy ózgeredi, adam quqyqtary birinshi orynǵa shyǵady. Bul - asa mańyzdy. Konstıtýtsııada Adam quqyqtary jónindegi ombýdsmen jańa mártebege ıe bolady. Ombýdsmen Konstıtýtsııalyq Sotqa júgine alady. Ol organ da biz úshin jańa ınstıtýt», - dedi Qasym-Jomart Toqaev.

Memleket basshysy elordadaǵy Oqýshylar saraıynda ornalasqan №59 daýys berý ýchaskesine kelip, respýblıkalyq referendýmda óz tańdaýyn jasaǵanyn budan buryn jazǵan bolatynbyz. Keıin Q.Toqaev BAQ ókilderiniń suraqtaryna jaýap berdi.