Qazaqstandyqtardy telefon arqyly aldaǵan alaıaqtardyń Ýkraınadaǵy sall-ortalyǵy joıyldy
«Qazaqstan Respýblıkasy ІІM Kıberqylmysqa qarsy kúres ortalyǵynyń qyzmetkerleri Ýkraına Ulttyq polıtsııasyndaǵy áriptesterimen birlesken jedel is-sharalardy ótkizý kezinde Dnepr qalasyndaǵy alaıaqtardyń Sall-ortalyǵy qyzmetin toqtatty.
Qazaqstan azamattaryna qatysty ınternet-alaıaqtyqpen aınalysatyn transulttyq qylmystyq toptyń uıymdastyrýshylary men músheleri anyqtaldy. Olar Qazaqstan azamattaryna telefon soǵyp, ózderin bankterdiń, quqyq qorǵaý organdarynyń qyzmetkerleri retinde tanystyryp, kúdikti tranzaktsııalar týraly habarlap, belgisiz tulǵalar olardyń esepshottaryna qol jetkizdi jáne tranzaktsııalardy toqtatamyz degen jeleýmen klıentterdi qarjylyq málimetterdi berýge kóndirgen, onlaın-nesıeler aldyrǵan. Mundaı aqparatty alǵan shabýylshylar jábirlenýshilerdiń aqshasyn qylmyskerlerdiń baqylaýyndaǵy esepshottarǵa aýdarǵan.
Qylmystyq topty uıymdastyrýshylar alaıaq baılanys ortalyǵynyń operatorlaryn yntalandyryp, qylmystyq jolmen qol jetkizgen somaǵa ósimaqy tólep otyrǵan», - dedi QR ІІM Krımınaldyq polıtsııa departamenti Kıberqylmysqa qarsy kúres ortalyǵynyń bastyǵy Jandos Súıinbaı.
Qylmyskerler banktik shottardy, sondaı-aq offshorlyq shottar men krıptovalıýta ámııandaryn paıdalanǵan. Olar arqyly alaıaqtyq qurbandarynan urlanǵan aqshany belgili bir paıyzǵa qolma-qol aqshaǵa aınaldyryp otyrǵan.
«Bul rette Ýkraına tarapy kúdiktilerdiń Dnepropetrovsk oblysyndaǵy 13 turǵylyqty mekenjaıynda tintý júrgizdi. Jedel-izdestirý sharalary barysynda 45 kompıýterlik tehnıka, 24 uıaly telefon, sim-karta jáne basqa da zattaı aıǵaqtar tárkilendi. Tárkilengen kompıýterlerde qońyraý shalý kezinde abonenttik nómirlerdi aýystyrýǵa arnalǵan baǵdarlamalyq jasaqtama bar ekeni anyqtaldy. Osy baǵdarlamalardyń jýrnal faıldaryn qaraý kezinde qazaqstandyq operatorlardyń abonentteriniń nómirlerine alaıaqtyq qońyraýlar tarıhy anyqtaldy.
Sondaı-aq, tárkilengen tehnıkany tekserý barysynda Qazaqstan Respýblıkasy azamattarynyń jeke derekteri jáne Qazaqstan Respýblıkasy Ulttyq Bankiniń emblemasy bar derekter kózi tabyldy. Bul aqparatty alaıaqtar ózderiniń shottarynan aqsha jymqyrý úshin ford-qońyraý shalý úshin paıdalanǵan», - deıdi spıker.
Arnaıy operatsııa barysynda qylmystyq toptyń Ýkraına azamattary arasynan shyqqan 32 múshesi ustaldy. Call-ortalyǵy 40 adamnan quralǵan. Qazirgi ýaqytta Ýkraına tarapy qazaqstandyq kıberpolıtsııanyń kómegi arqyly tergeý áreketteri men jedel-izdestirý is-sharalaryn júrgizip jatyr. Olar quqyqqa qaıshy qyzmettiń barlyq mán-jaılaryn, qosymsha epızodtaryn, yqtımal qatysýshylaryn anyqtaýǵa, sondaı-aq osy qylmystyq toptyń Qazaqstan azamattaryna keltirgen zalalyn anyqtaýǵa baǵyttalǵan.
Foto:polisia.kz