Qazaqstandyqtardy mereke kúnderi mas kúıde kólik júrgizbeýge shaqyrdy

NUR-SULTAN. QazAqparat - Quqyqtyq statıstıka jáne arnaıy esepke alý jónindegi komıteti qazaqstandyqtardy mereke kúnderi qarsańynda mas kúıde kólik júrgizbeýge shaqyrdy, dep habarlaıdy QazAqparat komıtettiń baspasóz qyzmetine silteme jasap.

«Mereke kúnderi qarsańynda mas kúıinde kólik júrgizý zańsyz áreket bolyp tabylatynyn esterińizge salamyz. Bul adamdardyń ólimine nemese jaraqattanýyna ákelýi múmkin, al alkogol ishimdik ishý nemese qoǵamdyq orynda mas kúıde bolý túrli jaǵymsyz oqıǵalarǵa, tipti qylmys jasaýǵa da alyp keledi.

Máselen, Quqyqtyq statıstıka jáne arnaıy esepke alý jónindegi komıtetiniń statıstıkalyq derekterine sáıkes 2020 jyly alkogolden, esirtkiden jáne (nemese) ýytqumarlyqtan masań kúıde jasalǵan kóliktegi 23 509 quqyq buzýshylyq tirkeldi», delingen habarlamada.

Onyń ishinde 19 282 quqyq buzýshy ákimshilik qamaýǵa alyndy, 17 203 mas júrgizýshi arnaıy quqyǵynan aıyryldy, 1 840 adamǵa 157 mln teńge somasynda aıyppul salyndy.

«Eger adam kólik quralyn basqarsa ne basqarý nátıjesinde JKO alkogoldik masań kúıde jasasa jáne jábirlenýshiniń densaýlyǵyna jeńil zııan keltirse, onda ol kólik quralyn basqarý quqyǵynan aıyra otyryp, ákimshilik jaýaptylyqqa tartylatynyn nazaryńyzǵa salamyz.

Keıin, bul qaıtalanǵan jaǵdaıda, qylmystyq jaýapkershilik týyndaıdy», delingen habarlamada.

2020 jyly Qylmystyq kodekske mas kúıinde jol qozǵalysy erejesin buzǵany úshin (345-1-baby) árekettiń aýyrlyǵyna baılanysty 10 jylǵa deıingi merzimge bas bostandyǵynan aıyrý jáne ómir boıyna arnaıy quqyqtan aıyrý qarastyrylǵan túzetýler kúshine endi.

Sondaı-aq, buryn quqyǵynan aıyrylǵan adamnyń kólik quralyn mas kúıinde basqarǵany úshin jazalaý sharalary kúsheıtildi (QK 346-baby).

Osy jyly el boıynsha alkogoldik, esirtkilik jáne (nemese) ýytqumarlyq masań kúıde bolǵan qatysýshylardyń kinásinen oryn alǵan 2 792 myń JKO tirkeldi. Osy jol kólik oqıǵalarynda 108 adam qaza boldy.

Adamdardyń qaza bolýyna jáne jaraqattanýyna ákep soqqan mas kúıinde JQE buzǵany úshin 225 adam sottaldy, onyń ishinde 177-si bas bostandyǵynan aıyrý jazasyna tartyldy.

Sonymen qatar, mas kúıinde qoǵamdyq oryndarda bolǵany nemese ishimdik ishkeni úshin 11 175 adam ákimshilik jaýapkershilikke tartyldy, onyń 137-i kámeletke tolmaǵandar. 348 quqyq buzýshyǵa qatysty ákimshilik qamaýǵa alý túrindegi jaza taǵaıyndaldy, qalǵandary ákimshilik aıyppul tóledi.

«Aldaǵy jańa jyl merekesinde barlyq júrgizýshiden avtokólik quralyn mas kúıinde basqarýǵa jol bermeýin suraımyz», delingen habarlamada