Qazaqstandyqtardy qajylyqqa aparatyn eki áýe kompanııasy bekitildi
Qajylyqqa daıyndyq sheńberinde Qazaqstan Respýblıkasy delegatsııasynyń Saýd Arabııasy Koroldiginiń avıatsııalyq bılik organdarymen (Azamattyq avıatsııanyń bas basqarmasy) kezdesýi ótti. Kezdesý barysynda Qazaqstan musylmandary dinı basqarmasynyń, QR IIDM azamattyq avıatsııa komıtetiniń, QR Qoǵamdyq damý mınıstrliginiń qoǵamdyq kelisim komıssııasynyń, QSA-daǵy QR konsýldyqtary men «SCAT áýe kompanııasy» AQ ókilderi Saýd Arabııasyna qazaqstandyq qajyǵa barýshylardy jetkizý máselelerin talqylady.
«Bıyl qajylyq maýsymy tamyz aıyna (shamamen 9-14 tamyz aralyǵy) týra keledi. Saýd Arabııasy tarapynyń talaptaryna sáıkes, Jıdda men Mádınaǵa reıster 4 shildeden 5 tamyzǵa deıin oryndalyp, jolaýshylar Saýd Arabııasynan 2019 jyldyń 17 tamyzynan 14 qyrkúıegine deıin ushyp ketýi tıis», - delingen habarlamada.
Kezdesý barysynda Koroldiktiń avıatsııalyq bıligi qazaqstandyq qajylardy tasymaldaý jumysyn Flynas jáne Nesma áýe kompanııalary oryndaıtynyn habarlady.
«Qazirgi ýaqytta SCAT áýe kompanııasy osy jyldyń kókteminen bastap Qazaqstan men Saýd Arabııasy arasynda tikeleı turaqty reısterdi ashýdy kózdep otyr. Osylaısha, qazaqstandyq qajylyqtar Saýd Arabııasyna tek qana qajylyq maýsymynda ǵana emes, sondaı-aq jyl boıy ýmra jasaı alady. Budan basqa, elder arasyndaǵy tikeleı turaqty reıster saýda-ekonomıkalyq qatynastardy nyǵaıtýǵa, Qazaqstanǵa kelý týrızmin damytý sheńberinde Arab túbeginiń qosymsha jolaýshylar tasymalyn, týrısterdi tartýǵa múmkindik beredi», - delingen habarlamada.
Ótken jyly qazaqstandyq qajylardy eki eldiń áýe kompanııalary sátti ári qaýipsiz tasymaldaǵan bolatyn.
Eske sala ketsek, byltyr Saýd Arabııasy Koroldigi Qazaqstanǵa qajylyq sapar úshin 3 myń kvota bólip, barlyq kvota boıynsha qazaqstandyqtar qajylyqqa baryp keldi.
