Qazaqstandyqtardy Ebola bezgegimen baılanysty Afrıkaǵa saparǵa shyqqanda saq bolýǵa shaqyrdy
ASTANA. QazAqparat - Afrıkada Ebola bezgegi 660 adamnyń ómirin qıyp ketti. Gvıneıa, Lıberııa jáne Serre-Leone densaýlyq saqtaý mınıstrlikteriniń aqparaty boıynsha indettiń tirkelýiniń jańa oqıǵalary jalǵasýda, dep habarlady QR Tutynýshylar quqyǵyn qorǵaý agenttiginiń baspasóz qyzmeti.
«Qazaqstan Respýblıkasy halqynyń sanıtarlyq-epıdemıologııalyq saýlyǵyn qamtamasyz etý maqsatynda agenttik sheteldik saparlardy josparlaýda usynylǵan aqparatty eskerýdi usynady», - delingen habarlamada.
Agenttik málimetteri boıynsha, qazirgi kezde Ebola bezgeginiń 1093 oqıǵasy tirkelgen, onyń ishinde 660 adam ólim qushqan, olardyń - 415 oqıǵasy Gvıneıada bolǵan, onyń ishinde 314-i kóz jumdy, Lıberııada - 224 (127), Serra-Leonede - 454 (219). Sońǵy úsh aptada Gvıneıada jańa oqıǵalardyń azaıýy tirkelgen. Degenmen Dúnıejúzilik densaýlyq saqtaý uıymy Gvıneıaǵa, Lıberııaǵa nemese Serra-Leonege saparǵa nemese saýdaǵa qatysty barýǵa qandaı da bir shekteýler qoıýdy usynyp otyrǵan joq.
«Ońtústikafrıkalyq elderde bolǵanda jáne sapardan oralǵan boıda aýrýdyń belgileri baıqalsa, shuǵyl medıtsınalyq kómekke júginý qajet. Jaǵdaı baıqaýǵa alynyp otyr», - delingen habarlamada.
Ebola qandy bezgegi aýyr vırýstyq juqpaly indet. Ol sırek kezdeskenimen, óte qaýipti - klınıkalyq jaǵdaıda patsıenttiń 50-90 paıyzyn ólimge ushyratady. Inkýbatsııalyq kezeńi 2 kúnnen 21 kúnge deıin sozylady.
