Qazaqstandyqtardy AQSh-ta tegin demalý qyzyqtyrady
ASTANA. QazAqparat - ıAndeks sarapshylary Qazaqstan turǵyndary 2018 jyldyń maýsym-shilde aılarynda saıahattaý jáne demalý úshin qandaı suraqtardy jıi qoıǵandyǵyn anyqtady, dep habarlaıdy QazAqparat tilshisi.
Suraýly sózderi (ne, qaıda, qansha jáne t.b.) jáne «demalys», «sapar», «teńiz», «saıahat» sózderin qoldana otyryp qoıylǵan saýaldar eskerilgen.
Jazǵy demalysqa qatysty qazaqstandyqtardyń 5 úzdik suraqtaryna mynalar kiredi: «Qaıda demalýǵa barýǵa bolady?», «Aqtaýdaǵy Kaspıı teńizi sýy qansha gradýs?», «Teńizge ózińmen birge ne alyp barý qajet?», «Túrkııanyń qaı jerinde demalǵan jaqsy?», «Qyrǵyzstandaǵy Ystyqkólde qaı ýaqytta demalǵan jaqsy?».
Qazaqstandyqtardyń saıahattaýǵa eń joǵary suuranysy shilde aıynda tirkelgen. Osy aıda «demalys» sózi qoldanylǵan saýaldar eń kóp tirkelgen. Al qazaqstandyqtardy qazan aıynda saparlar onsha qyzyqtyrmaıtyndyǵy anyqtalǵan.
Keıbir azamattar Internetten naqty keńester de izdeıdi: AQSh-ta tegin qalaı demalýǵa bolady, BAÁ-ge sapar aldynda qandaı máselelerdi bilgen jón, eger otbasynda kelispeýshilik bolsa demalys ornyn qalaı durys tańdaǵan jón, teńizge demalýǵa barǵan kezde qalaı ádemi sýretke túsýge bolady.
Qazaqstandyqtar arasynda shetelde jazǵy demalys ótizýde tanymaldyqqa ıe bolǵan elder mynalar: Túrkııa, Reseı, Mysyr, BAÁ, Qytaı, Taıland, Grýzııa, Qyrǵyzstan, Germanııa jáne Grekııa.
Demalys ornyn izdeý barysynda qazaqstandyqtar naqty eldi barlyq ýaqytta kórsete bermeıdi. Máselen, Sochı jáne Qara teńiz jaıynda suraıdy. Qytaımen qatar Haınan aralyna qyzyǵýshylyq tanytady. Qyrǵyzstannan bólek Ystyqkóldi izdeıdi.
Al eger Qazaqstannyń ǵana shıpajaılaryn eskerer bolsaq, onda eń úzdikter qatarynda Kaspıı teńizi, Alakól men Balqash kólderi bar.
Qazaqstandaǵy jazǵy demalys úshin jaıly 5 oryn - Kaspıı teńizi, Balqash, Alakól, Aral jáne Qapshaǵaı sý qoımasy.
