Qazaqstandyqtardy 60 mln teńgege aldap ketken alaıaq Dýbaıda ustaldy

NUR-SULTAN. QazAqparat – Qazaqstandyq kásiporyndardyń 60 mln teńgeden astam qarjysyn alaıaqtyq jolmen qoldy etken aıypty BAÁ-de tutqyndaldy. Bul týraly ishki ister mınıstrliginde onlaın ótken baspasóz máslıhaty barysynda belgili boldy, dep habarlaıdy QazAqparat tilshisi.

«BAÁ-den qazaqstandyq kásiporyndardy 60 mln teńgeden astam somaǵa aldap ketken alaıaq qaıtaryldy. Іshki ister mınıstrligi ınterpoldyń ulttyq ortalyq bıýrosy Dýbaı qalasyndaǵy QR bas konsýldyǵymen jáne qarjy monıtorıngi agenttigimen ózara is-qımyl kezinde BAÁ-den Qazaqstanǵa 2015 jyldan beri asa iri mólsherde alaıaqtyq jasaǵany úshin izdestirilip jatqan 43 jastaǵy qylmysker Tólegen Ramıev qaıtaryldy», - dedi QR ІІM ókili Shuǵyla Turlybek.

Mınıstrlik ókiliniń málimdeýinshe, qazirgi ýaqytta aıypty qamaýǵa alyndy.

«Sońǵy 3 aıda ınterpoldyń jumysynyń nátıjesinde Ispanııa, Reseı, Bahreın, BAÁ, Grýzııa, Vengrııa jáne taǵy basqa elder aýmaǵynan túrli qylmystar úshin izdestirilip jatqan 16 adam anyqtaldy. Mysaly, qańtar aıynda Vengrııada hakerlik áreketter arqyly aqsha urlaǵany úshin Almaty qalasynyń polıtsııa departamenti izdestirip jatqan Rýmynııa azamaty ustaldy. Ol transulttyq uıymdasqan qylmystyq toptyń quramynda Qazaqstan, Reseı, Qytaı, Ýkraına, Ázerbaıjan bankteriniń shottaryna hakerlik shabýyl jasap, aqsha jymqyrǵan. Shyǵyn somasy 9 mln AQSh dollaryn quraıdy. Búginde aıyptyny elimizge berý máselesi qaralyp jatyr», - deıdi ol.