Qazaqstandyqtar jylyna 2 ret emhana aýystyra alady - mınıstr
«Biz qaǵaz júzinde tirkeýden bas tarttyq, sebebi onda kemshilik kóp boldy. Turǵyndardyń ózine aıtpaı, syrtynan tirkep jiberetin sátter boldy. Ózim de sondaı oqıǵanyń qurbany boldym. Meni basqa oblysqa tirkep qoıǵan. Adamdardyń ózi emhanaǵa baryp, tirkelmegendikten osyndaı máseleler oryn alady. Men de atalǵan oqıǵadan keıin Nur-Sultan qalasynyń aýrýhanasyna tirkeldim. Ár adam óz densaýlyǵy úshin jaýapkershilikti túsinýi qajet», - dedi mınıstr jýranısterge bergen suhbatynda.
Onyń aıtýynsha, emhanaǵa tirkelý arqyly halyq birneshe máseleni sheshe alady.
«Bul máseleni boldyrmaý úshin ákimdikterge tapsyrma berdik. Árbir emhanada halyqtyń E-gov arqyly tirkelýine kómektesetin adamnyń otyrýyn tapsyrdyq. Elektrondy tsıfrlyq qoltańbaǵa úırenip qaldyq, degenmen ony qoldana almaıtyn qart adamdar bar. Sondyqtan, emhanaǵa tirkelýde kómek suraǵandarǵa járdem berilýi tıis», - dep atap ótti E. Birtanov.
Sonymen birge, mınıstr emhanaǵa jylyna eki ret tirkelýge bolatynyn jetkizdi.
«E-gov portalyna kirseńizder, «Elektrondy qujat» terezesi paıda bolady. Onda qaı emhanaǵa, qaı dárigerge tirkelgenińizdi kóre alasyz. Ázirge jylyna eki ret qaıta tirkelý múmkindigin berip otyrmyz. Tirkelý týraly aqparat bizge kelip túsedi de, jan basyna qarjylandyrý tártibimen emhanaǵa qarajat aýdaramyz. Muny kún saıyn baqylap otyra almaımyz, sondyqtan jylyna eki ret emhana aýystyrýǵa múmkindik beriledi», - dedi Eljan Birtanov.