Qazaqstandyqtar jumys izdeý mashaqatynan qutylady
Atalǵan bırja qazirgi enbek.kz portaly negizinde jumys isteıtin bolady. Onda jumys izdep júrgen azamattar men bos oryndar týraly tolyq aqparat jarııalanady."Elektrondy bırjany qurýdyń negizgi maqsaty - bir jaǵynan el azamattary úshin jumys izdeýdi barynsha jeńildetý, ekinshi jaǵynan jumys berýshiler úshin qajetti mamandardy jyldam tabýǵa kómektesý. Ol úshin jumyspen qamtýdyń memlekettik ortalyqtarynan, maman izdep jatqan kásiporyndardan, rekrýtıngtik kompanııalardan jáne jumys izdep júrgen azamattardyń ózderinen barlyq aqparatty jańartylǵan portalda ornalastyrý josparlanyp otyr. Budan bólek, jumys izdeýshiler úshin jeke elektrondy kabınetter ashylyp, onlaın rejimde suxbattasýdy uıymdastyrý qyzmetteri de bolady. Sonyń arqasynda ákimshilik kedergilerden qutylýǵa bolady. Bizdiń josparymyzǵa sáıkes, elektrondy eńbek bırjasy aǵymdaǵy jyly qyrkúıek aıynda iske qosylady", - dedi QR Eńbek jáne xalyqty áleýmettik qorǵaý vıtse-mınıstri Birjan Nurymbetov búgin Astanada ótken baspasóz máslıxatynda.
Onyń aıtýynsha, elektrondy eńbek bırjasy arqyly respýblıka boıynsha bos turǵan jumys oryndaryn kórýge bolady. Sondyqtan bir jerdiń turǵyny kórshi aýdandaǵy, ıa bolmasa, qaladaǵy bos jumys orny úshin talasa alady. "Endi, aýyldy jerlerde jumys kóp tabyla bermeıdi. Ony bárimiz jaqsy bilemiz. Sondyqtan ondaı jerlerde biz shaǵyn nesıeni kóptep berip, azamattardyń jeke kásibin ashýyna, sol arqyly ózin-ózi jumyspen qamtýyna jaǵdaı jasaıtyn bolamyz", - dep atap kórsetti Nurymbetov.
