Qazaqstandyqtar jol talǵamaıtyn kólikti satyp alýdy jón kóredi
ASTANA. QazAqparat - «KazAvtoProm» Qazaqstannyń avtomobıl salasyndaǵy kásiporyndarynyń odaǵy qazaqstandyqtardyń jol talǵamaıtyn jeńil avtokólikterdi satyp alýǵa basymdylyq beretindigin aıtty, dep habarlaıdy QazAqparat.
«2017 jyldyń I toqsanyndaǵy jaǵdaı boıynsha jańa jeńil avtokólikterdi satyp alýda negizinen Almaty (2 034 satylǵan avto), Astana (1 392 birlik), Atyraý (575 bir.), Qostanaı (462 bir.), Shymkent (445 bir.), Qaraǵandy (402 bir.), Aqtaý (341 bir.), Óskemen (318 bir.), Oral (307 bir.) jáne Aqtóbe (304 bir.) qalalarynyń turǵyndary belsendilik tanytqan»,-delingen «KazAvtoProm» taratqan baspasóz baıanynda.
Avtokólik brendteri reıtınginiń basyna Lada men Toyota markalary jaıǵasqan. Reseılik markaly avtokólikterdi Aqmola, Atyraý, Shyǵys Qazaqstan, Jambyl, Batys Qazaqstan, Qostanaı, Pavlodar jáne Soltústik Qazaqstan oblystarynyń turǵyndary kóptep satyp alǵan.
Turǵyndar satyp alǵan avtokólikterdiń ishinde Lada 4x4 markasy kósh bastap tur. Jol talǵamaıtyn Lada 4x4 markasy 6 óńirde, atap aıtqanda, Aqtóbe, Atyraý, Jambyl, Batys Qazaqstan, Qaraǵandy jáne Soltústik Qazaqstan oblystarynda eń kóp satylǵan kólik bolyp tirkelgen. Odan keıingi orynda Ravon Nexia, Toyota Camry markalary tur.
«Atalǵan kezeń ishinde Astana qalasynda satyp alynǵan jańa avtomobıldiń ortasha quny 10,1 mln teńgeni, al Almaty qalasynda 9,7 mln teńgeni qurady»,- dep habarlaıdy «KazAvtoProm» Qazaqstannyń avtomobıl salasyndaǵy kásiporyndarynyń odaǵy.
