Qazaqstandyqtar jol qurylysy men oǵan ketken qarjyny onlaın rejimde baqylaıdy

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi "QazAvtoJol" ulttyq kompanııasymen birlesip, arnaıy ınteraktıvti kartany ázirlep jatyr. Ol arqyly kez kelgen azamat joldyń qurylysyn ǵana emes, qarjynyń kólemi men ony ıgerýdi de onlaın rejimde baqylaı alady, dep habarlaıdy QazAqparat tilshisi.

Sybaılas jemqorlyqqa qarsy kúres departamentiniń dırektory Salaýat Mýksımovtyń aıtýynsha, qoǵamdyq baqylaý sharalaryn sala-sala boıynsha júrgizý kózdelgen. Osy oraıda aldymen jol qurylysyna basymdyq berilmek. "Qazirgi kezde arnaıy ınteraktıvti karta ázirlenip jatyr. Ol arqyly jol qurylysyn bes baǵytta baqylaýǵa bolady. Olar - joldy qalpyna keltirý, kúrdeli jóndeý, aǵymdaǵy jóndeý, joldy kútip ustaý jáne joldyń boıyndaǵy qyzmetter. Osylaısha, kez kelgen azamat ǵalamtordaǵy arnaıy paraqshada jol qurylysyn árbir metrine deıin qadaǵalaı alady. Budan bólek, merdiger týraly aqparat, bıýdjetten bólingen aqsha, joldyń texnıkalyq talaptary jáne taǵy basqa málimetterdi kórýge múmkindik bolady" , - dedi S.Mýksımov Astanada ótken baspasóz máslıxatynda.

Departament basshysynyń sózine qaraǵanda, qazirgi kezde "QazAvtoJol" AQ-symen birge tıisti jumystar aıaqtalyp jatyr. Interaktıvti karta osy jyldyń ekinshi toqsanynda iske qosylady degen jospar bar.

Aıta keteıik, agenttik memlekettik qyzmetshilerdiń jumysyn baqylaý sharalaryn da birneshe baǵytta júrgizip keledi. 

Foto: 163gorod.ru