Qazaqstandyqtar «Jer saǵaty» sharasyna qatysyp, bir saǵatqa elektr qýatyn óshirmek
ALMATY. 26 naýryz. QazAqparat /Ádilet Musahaev/ - Qazaqstandyqtar «Jer saǵaty» sharasyna qatysady. Atalǵan shara búgin Astana ýaqyty boıynsha saǵat 20:30-21:30 aralyǵynda ótedi.
Ár jyl saıyn naýryz aıynyń sońǵy senbisinde álemniń mıllıondaǵan halqy elektr shamyn bir saǵatqa óshiredi. «Jer saǵaty» - bul tabıǵatqa degen qamqorlyqtyń belgisi, bizdiń ǵalamshardaǵy jetkiliksiz qorlardy únemdeýdegi alǵyshart. Sonymen qatar adam balasy tarıhyndaǵy jappaı qoǵamdyq aktsııa bolyp tabylady.
«Bul jyly atalǵan shara «Jer saǵaty - bul saǵatqa qaraǵanda kóbirek» uranymen ótýde. Bıyl tek shamdy ǵana sóndirmeı, elektr qýatyn, sýdy únemdeýdi, avtokólikti sırek paıdalanyp, makýlatýra men taǵy basqa qaldyqtardy qaıta óńdeýge tapsyrý kóterilýde»,- deıdi Qazaqstandaǵy sharanyń úılestirýshisi, «Jasyl rýhanııat» partııasynyń tóraǵasy Pavel Koktyshev.
Ǵalymdardyń paıymdaýynsha, 1961 men 2003 jyldar aralyǵynda ǵalamshardyń ekojúıesine adamzattyń yqpalynan ekologııalyq aqaýlar bir jarym esege ulǵaıǵan. Eger qazirgi ustanymdar saqtalatyn bolsa, 2050 jyly adamzatty elektr qýatymen, sýmen jáne azyq-túlikpen qamtamasyz etý úshin bizge basqa ǵalamshar qajet bolady eken. Bul máselelerdi sheshý úshin saıası, strategııalyq, tehnologııalyq jáne tájirıbelik ispettes deńgeıde qarastyrý kerek. Sonymen birge naqty nátıjege jetý barlyǵymyzdyń jáne jekeleı ár adamnyń ómirinde ne nárseni bolsyn únemshildikpen tutynýynda jatyr.
