Qazaqstandyqtar jemqorlyqqa tózimsizdik tanyta bastady - Marat Báshimov

NUR-SULTAN. QazAqparat - Qazaqstandyqtar jemqorlyqqa tózimsizdik tanyta bastady. Mundaı pikirdi Eýropalyq quqyq jáne adam quqyqtary ınstıtýtynyń dırektory Marat Báshimov bildirdi, dep habarlaıdy QazAqparat tilshisi.

«Qazirgi ýaqytta bizdiń sanamyz ózgergen. Árkim ózin, otbasyn oılap, qarbalastyq azaıdy. Kóptegen jaıttan qorqýdy da qoıdyq. Mine, osynyń aıasynda jemqorlyqpen ymyrasyz kúres júrgizýimiz qajet», - dedi ol Sybaılas jemqorlyqqa qarsy is-qımyl agenttigi alańynda ótken onlaın brıfıng barysynda.

Sonymen qatar M.Báshimov elimizde bul baǵytta júrgizilip jatqan reformalardyń da jemqorlyqpen kúreske oń yqpal tıgizip otyrǵandyǵyn basa aıtty.

«Adamdar aqshasymen, tamyr-tanysymen jaltaryp ketýine múmkindik beretin barlyq qaltarystarǵa tosqaýyl qoıyldy. Endi adam jasaǵan áreketi úshin túrmege otyratyndyǵyn túsinýi tıis. Qazirgi ýaqytta elimizde «ashyq bıýdjet» boıynsha óte jaqsy baǵdarlama júzege asyrylyp jatyr. Osy baǵdarlamanyń arqasynda kez kelgen azamat bıýdjettiń ár teńgesiniń qaıda jumsalǵandyǵyn qadaǵalap otyra alady. Osy jumysty odan ary jalǵastyrǵan jón», - dedi Marat Báshimov.

Instıtýt dırektorynyń atap ótýinshe, jemqorlardan memleket paıdasyna óndirilip alynǵan aqsha qarajatyn densaýlyq saqtaý, bilim berý salalaryna jumsap, aýrýhanalar men mektepter, balabaqshalar salý qajet.