Qazaqstandyqtar jemqorlyq jaılaǵan memlekettik organdardy anyqtady

ASTANA. QazAqparat - Qazaqstannyń azamattyq alıansy ótkizgen saýalnama barysynda jemqorlyq jaılaǵan memlekettik organdar anyqtaldy. Búgin Astanada jemqorlyqqa qarsy kúres sharalaryna qatysty dóńgelek ústelde atalǵan saýalnamanyń qorytyndylary shyǵaryldy.

Qazaqstannyń azamattyq alıansynyń dırektory Ildar Katenovtiń atap ótkenindeı, saýalnamanyń negizinde suralǵan adamdardyń 47 paıyzy polıtsııa qyzmetkerleri jemqorlyqqa jıi barady dep kórsetken.

Sonymen qatar, bilim berý - 31, densaýlyq saqtaý 29 paıyz kórsetkishpen paraqorlyq óristegen organdar dep tanyldy.

«Bılik organdaryna para berýge týra kelgen jaǵdaılar boldy ma?» degen saýalǵa saýalnamaǵa qatysqan halyqtyń 47 paıyzy «ıá» dep jaýap bergen. Azamattardyń 60 paıyzy paradan keıin másele jyldam sheshilgenin jetkizgen jáne jemqorlyq máseleni sheshýdiń tez ári tıimdi tásili dep esepteıdi», - deıdi I. Katenov.

«Jemqorlyqtyń basty sebebi nede?» degen suraqqa saýalnamaǵa qatysqandardyń 47 paıyzy memlekettik qyzmetkerlerdiń aram pıǵyly men sarańdyǵynan dese, 37 paıyzy adamdardyń mentalıteti sebep dep kórsetken. Al 32 paıyzy jemqorlyq memlekettik qyzmetkerlerdiń kiristeri men shyǵystaryn jetkilikti deńgeıde qadaǵalamaýdan oryn alady dep oılaıdy.

«Sonyń ishinde Taldyqorǵan turǵyndarynyń 72,7 paıyzy, Kókshetaý halqynyń 46 paıyzy jemqorlyqqa qarsy kúrestiń tıimdiligi tómen dep esepteıdi», - dep atap ótti ol. Saýalnama barysynda jemqorlyq faktileri jıi ushyrasatyn óńirler de belgili boldy. Atyraý, Taraz, Almaty, Astana, Taldyqorǵan turǵyndary óz óńirlerindegi jemqorlyqtyń deńgeıin óte joǵary dep baǵalap otyr.