Qazaqstandyqtar jedel járdemdi azyraq shaqyra bastady - Birtanov

ASTANA. QazAqparat -Azamatttar burynǵyǵa qaraǵanda jedel járdem qyzmetin azyraq shaqyra bastady. Bul týraly Úkimet otyrysynan keıin jýrnalısterge QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Qazirgi tańda Densaýlyq saqtaý mınıstrliginiń jedel medıtsınalyq kómekti jetildirý boıynsha jańa buıryǵy qabyldanyp qoıdy. Oǵan sáıkes, jedel járdem shaqyrýdyń tórt sanatyn bekittik. Olardyń alǵashqy úsheýine patsıenttiń densaýlyǵyna jáne ómirine qaýip tóndiretin jaǵdaılar enedi. Tórtinshi sanatqa - halyqtyń ishinde jıi kezdesetin sozylmaly aýrýlardyń dendeýi jatady. Osy buıryqqa sáıkes, tórtinshi sanattaǵy adamdarǵa qyzmet kórsetý mindettemeleri men tıisti qarajat aýrýhanalarǵa berilip qoıdy», - dedi Eljan Birtanov.

Mınıstrdiń aıtýynsha, bizdiń elimizde jedel járdem qyzmetine ótinýshilerdiń sany damyǵan elderden qaraǵanda on esege kóp. Osynyń saldarynan kúrdeli shaqtarda kóptegen medıtsınalyq kólikter bosamaı qalatyn kórinedi.

«Osynyń arqasynda (buıryqtyń - avt.) bizde jaǵdaı turaqtala bastady. Sebebi, kólikterdiń kóbiniń jumysy qalypqa kelip jatyr. Ýaqyt óte kele ótinimderdiń azaıǵanyn baıqadyq. Adamdar telefonǵa burynǵydan azyraq habarlasyp, syrqatyn sezse aýrýhanaǵa baryp, emdelý ústinde. Aýrýhanalarǵa patsıentterdi jedel járdemniń kómeginsiz emdeý yńǵaıly. Azdaǵan trendti baıqadyq. Endigi kezekte adamdardyń emdelý sapasyn arttyrý baǵytynda osy jumysty jalǵastyratyn bolamyz», - deıdi Eljan Birtanov.