Qazaqstandyqtar jarty jylda 44,4 trln teńgege onlaın tólem jasaǵan
Bul týraly QR Ulttyq banki tóraǵasynyń orynbasary Aqyljan Baımaǵambetov aıtyp berdi.
«Bıylǵy 6 aıda halyqtyń qolma-qol aqshasyz operatsııalary 44,4 trln teńgege deıin nemese 48%-ke ósti. Onlaın tólemderdiń úlesi 83%-ten asty.
Tsıfrlyq qarjy ınfraqurylymyn qurý jáne tsıfrlyq qarjylyq servıster ekojúıesin odan ári damytý maqsatynda bıylǵy shildede Open API jáne Open Banking-ti damytý jónindegi baıandama jarııalandy. Oǵan qosa, «Tsıfrlyq teńge» jobasy boıynsha sharalar júrgizilip jatyr», - dedi Aqyljan Baımaǵambetov Úkimettiń búgingi otyrysynda.
Sonymen birge, shilde aıynyń qorytyndysy boıynsha, Biryńǵaı jınaqtaýshy zeınetaqy qorynyń zeınetaqy aktıvteri 13,7 trln teńge bolyp, jyl basynan beri 609 mlrd teńgege nemese 4,7%-ǵa ulǵaıdy.
«Investıtsııalyq kiris kólemi jyl basynan beri 519,5 mlrd teńge boldy. Zeınetaqy aktıvteriniń kiristiligi sońǵy 12 aıda 8,2% kórsetip, zeınetaqy aktıvteriniń jınaqtalǵan kirisi 5 jylda jınaqtalǵan ınflıatsııadan 7,3 paıyzdyq tarmaqqa asyp tústi», - deıdi A. Baımaǵambetov.
Aıta keteıik, bıylǵy shildede jyldyq ınflıatsııa 15%-ǵa deıin ósti, oǵan azyq-túlik baǵasynyń ósýi eń kóp úles qosty.
Shilde aıynda teńgeniń dollarǵa qatysty baǵamy 477,07 teńgege deıin 1,5%-ǵa álsiregen.