Qazaqstandyqtar Jánibek Álimhanulynyń jekpe-jegin tikeleı efırden kóre alady

ASTANA. QazAqparat – WBO nusqasy boıynsha orta salmaqtaǵy álem chempıony Jánibek Álimhanulynyń (12-0, 8KO) brıtanııalyq Denzel Bentlıge (17-1-1, 14KO) qarsy jekpe-jegin qazaqstandyqtar tikeleı efırden kóre alady, dep habarlaıdy QazAqparat.

Álimhanuly – Bentlı aıqasy jeksenbi, 13 qarasha kúni tańerteń ótedi. Tikeleı kórsetilim «Habar» arnasynda astana ýaqytymen saǵat 08.00-de bastalady», - delingen Instagram-daǵy «Qazaqstannyń kásipqoı boksy» paraqshasynda.

Eske salaıyq, «Qazaq Style» laqap atymen tanymal Jánibek Álimhanuly bıylǵy 22 mamyrda brıtanııalyq Dennı Dıgnýmdy (14-0-1, 8 KO) ekinshi raýndta nokaýtqa túsirip, WBO nusqasy boıynsha orta salmaqta «ýaqytsha» chempıon atanǵan edi.

Keıin Amerıka boksshysy Demetrıýs Andrade J.Álimhanulymen mindetti jekpe-jekten bas tartty. Osyǵan baılanysty, qazaqstandyq boksshyǵa WBO nusqasy boıynsha orta salmaqtaǵy tolyq quqyly álem chempıony mártebesi berildi.

Boksshyny QR Prezıdenti Qasym-Jomart Toqaev quttyqtady.

Al 3 qazan kúni Top Rank promoýterlik kompanııasy J.Álimhanuly – D.Bentlı jekpe-jegin resmı túrde jarııalady.