Qazaqstandyqtar Jańa jyldy qalaı qarsy alady
ALMATY. QazAqparat - Jańa jylǵa birneshe saǵat qaldy. HeadHunter kompanııasy saýalnama júrgizý arqyly qazaqstandyqtardyń Jańa jyldy qalaı qarsy alatynyn anyqtady, dep habarlaıdy QazAqparat tilshisi.
Saýalnamaǵa el boıynsha 1038 adam qatysty.
«Saýlnamaǵa qatysqan qazaqstandyqtardyń 73% Jańa jyldy úıde, otbasymen atap ótýdi josparlap otyr. 9% týystaryna nemese dostaryna barady. 5% Jańa jyldy jumys ornynda qarsy alady, al 3% Jańa jyl túnin basqa elde ótkizýdi josparlaǵan», – deıdi kompanııanyń marketıng jáne PR menedjeri Dana Qasymova.
Saýalnama qatysqan keıbir respondentter bul meıramdy atap ótpeıtinin, al basqalary «tyshqan jylyn» dostarymen meıramhanalarda, taýda, Býrabaıda jáne basqa jerlerde toılaıtynyn jetkizdi.
Qazaqstandyqtardyń jańa jyldyq kóńil-kúıiniń kóterińki bolýy jaqyn jáne qymbat adamdaryna baılanysty. Jańa jyldyq merekeniń atmosferasyn qala kóshelerindegi gırlıandtar, jaýǵan qar men mandarınniń ıisi arqyly sezinýge bolady.
Respondentterdiń 5% jańa jyldyq kóńil-kúıdi ózderi qalaptastyratynyn aıtty. Sondaı-aq, olar ózgelerden marapat pen ıgi is kútetinin de jasyrmady.
«Saýalnamaǵa qatysqan adamdardyń 41% «Jańa jyldy qalaı atap ótseń, jyl solaı ótedi» degen yrymǵa senedi. Sondyqtan qazaqstandyq otbasylar Jańa jyl merekesin erekshe dástúrge aınaldyrǵan. Biri Jańa jyldy otbasymen, ata-anasymen birge qarsy alsa, endi biriniń otbasynda Aıaz Ata syılyqty shyrshanyń emes, jastyqtyń astyna qaldyrady. Keıbireýler eski jyldyń sońǵy mınýtynda tilegin aıtady», - deıdi Dana Qasymova.
Kelesi jylǵa arnalǵan maqsattar men josparlarǵa keletin bolsaq, qazaqstandyqtardyń 11% jańa jylda jańa jumys ornyn tapqysy keledi. 11% shetelge shyǵýdy josparlap otyr. 10% jańa daǵdylardy meńgergisi keledi. 8% páter satyp alýdy jáne shet tilderin meńgerýdi armandaıdy.
