Qazaqstandyqtar jańa kólikterge jarty trıllıon teńge jumsady
Uıymnyń vıtse-prezıdenti Anar Maqashevanyń aıtýynsha, ótken jyly qazaqstandyqtar 60 myń jańa kólikti satyp aldy. Sonyń teń jartysy - óz elimizde qurastyrylǵan avtomobılder. Jalpy, Qazaqstan xalqy jańa kólikterdi satyp alýǵa 547 mlrd teńge jumsady. Bul 2017 jylmen salystyrǵanda 24 protsentke artyq.
«Árıne, Úkimet tarapynan jasalǵan qoldaý sharalary otandyq avtoónerkásiptiń damýyna oń yqpalyn tıgizdi. Máselen, eski kólikterdi ýtılızatsııalaý baǵdarlamasy aıasynda qazaqstandyqtar 90 myń eski kólikti tapsyryp, jańa kólik satyp aldy. Búginde osy jumyspen «Operator ROP» kompanııasy aınalysady. Olar eski kólik úshin aqshany, ıa bolmasa, arnaıy aqshalaı kýálikti beredi. Atalǵan kýáliktiń aqshasyn salonnan jańa kólikti alǵanda paıdalanýǵa múmkindik bar. Bir adam eki kýáliktiń aqshasyn qosyp, sý jańa temir tulpardy satyp alýǵa sala alady. Budan bólek, 4 protsenttik avtonesıe bar. Úkimet atalǵan baǵdarlamaǵa qarjylaı qoldaý kórsetip, aǵymdaǵy jyly ony ary qaraı jalǵastyrady degen úmitimiz bar», - dedi A.Maqasheva Astanada ótken baspasóz máslıxatynda.
Aıta ketken jón, ótken jyly óz elimizde qurastyrylǵan kólikter ımportpen keletin avtomobılderdi yǵystyryp, óz úlesin alǵash ret 55 protsentke deıin jetkizdi. Qazaqstannyń avtobıznes qaýymdastyǵynyń boljamyna sáıkes, qazirgi kórsetkishter saqtala berse, 2019 jylda jańa kólik satylymy 70 myń danaǵa jetedi.
