Qazaqstandyqtar jańa kólikke bir aıda 74 mln dollar jumsaǵan
ASTANA. QazAqparat - «QazAvtoProm» Qazaqstan avtomobıl salasy kásiporyndarynyń odaǵy 2018 jyldyń qańtar aıyndaǵy jeńil avto naryǵynyń qorytyndysyn jarııalady, dep habarlaıdy QazAqparat.
2018 jyldyń alǵashqy aıynda 3,1 myńnan astam avtokólik satylǵan, bul 2017 jyldyń qańtaryndaǵy kórsetkishten 36,5%-ke kóbirek. Onyń 1,8 myńnan astamy ımport bolsa, 1,2 myńnan astamy - qazaqstandyq zaýyttardyń ónimi.
Qazaqstandyqtar jańa jeńil avtokólikter úshin 73,9 mıllıon dollar jumsaǵan (43,2% ósken).
«Qańtar aıynda qazaqstandyqtardyń suranysyna ıe bolǵan brendter arasynda Lada kósh bastap tur: respýblıka aýmaǵynda reseılik markanyń 785 danasy satylǵan. Toyota kólikteriniń 665 danasy ótken. Úshinshi orynda - 492 avtokóligi satylǵan Ravon markasy tur. Kóshbasshylardyń bestigin Hyundai (237) jáne GAZ (150) túıindeıdi. Sondaı-aq, tabysty markalardyń úzdik ondyǵyna KIA (133), Nissan (106), UAZ (73), Lexus (69) jáne Volkswagen (58) endi», - delingen baspasóz qyzmeti taratqan habarlamada.
Keltirilgen derekterge sáıkes, jeńil avtokólikterdi Almaty (745 avtokólik), Astana (517), Qostanaı (278), Atyraý (258), Shymkent (220), Qaraǵandy (158), Oral (148), Aqtóbe (139), Óskemen (132) jáne Aqtaý (122) turǵyndary satyp alǵan.
«Bul dınamıkanyń sebebin eń aldymen, 2017 jyldyń basyndaǵy tómen bazamen túsindirýge bolady. Odan bólek, bul kórsetkishter munaı baǵasynyń ósýimen jáne teńgeniń nyǵaıýymen qalyptasyp otyr. Dál osy negizgi faktorlar 2018 jyldaǵy suranys dınamıkasyna áser etedi. Sonymen birge, otandyq óndirýshilerdiń de nyǵaıyp kele jatqanyn baıqaýǵa bolady - qańtar aıyndaǵy satyp alýshylardyń 40 paıyzy otandyq avtokólikti tańdaǵan. Olardyń jelisi keńeıip keledi jáne jeńildikpen nesıe berý baǵdarlamasynyń qosymsha qarjylandyrýy qazaqstandyq avtokólikterdi satyp alýǵa tıimdi jaǵdaı jasap otyr», - dep pikir bildirdi QazAvtomProm tóraǵasy Oleg Alferov.
