Qazaqstandyqtar jańa kólik satyp alýǵa jyl basynan 98 mlrd teńge jumsaǵan
NUR-SULTAN. QazAqparat –Qazaqstanda 2020 jyldyń basynan beri resmı dılerler 10 myńnan astam jańa kólik satty. Bul týraly QazAqparat «QazAvtoÓnerkásip» avtokólik salasyndaǵy kásiporyndar odaǵyna silteme jasap habarlaıdy.
«Jyl basynan beri resmı dılerler 10 724 kólikti satty. Bul bir jyl burynǵy kórsetkishten 24,6 paıyzǵa joǵary. Qańtar-aqpan aılarynda qazaqstandyqtar jańa jeńil kólikterdi alýǵa 97,6 mlrd teńge jumsap, 2019 jylǵy deńgeıden 20,5 paıyzǵa artyq boldy», - delingen taratylǵan málimette.
Kólik satyp alýshy 6 929 adam (64,6 paıyzy) otandyq zaýyttardyń ónimine óz tańdaýyn jasaǵan. Sonymen qatar, bıylǵy eki aıda satylǵan 3 725 avtomobıl (35,4 paıyzy) ımportqa tıesili bolyp otyr.
Atalǵan merzimde elimizde suranysy joǵary brendterdiń arasynda Hyundai (2138 kólik), Lada (2010), Toyota (1436), Ravon (1294) jáne KIA (1105) kósh bastady.
Munymen qosa, jaqsy ótkizilgen TOR-10 quramyna Renault (501 kólik), Nissan (427), GAZ (349), Volkswagen (321) men Lexus (211) endi.
