Qazaqstandyqtar zeınetaqy jınaǵyndaǵy 319 mlrd teńgeni em-domǵa jumsady

ASTANA. QazAqparat – Salymshylar óz zeınetaqy jınaqtarynyń bir bóligin merziminen buryn alý aıasynda 3,5 trln teńgeni ıgerdi. Bul týraly QR Ulttyq banki tóraǵasynyń orynbasary Álııa Moldabekova aıtty, dep habarlaıdy QazAqparat tilshisi.

Ulttyq bank ókili 2021 jyldan bastap salymshylar ózderiniń jınaqtarynyń bir bóligin turǵyn úı jaǵdaıyn jaqsartýǵa, basqarýshy kompanııalarǵa tapsyrýǵa jáne em-dom alýǵa jumsaǵanyn eske saldy.

Bul múmkindik aıasynda salymshylar 3,5 trln teńgeni atalǵan maqsattarǵa baǵyttady.

«Atap aıtqanda, 3,17 trln teńge (90,6 paıyzy) baspana máselesin sheshýge, 318, 8 mlrd teńge (9,1 paıyzy) emdelýge, sondaı-aq 8,7 mlrd teńge (0,25 paıyzy) basqarýshy kompanııalarǵa aýdaryldy», - dedi Álııa Moldabekova Senatta depýtattarmen kezdesý kezinde.