Qazaqstandyqtar zeınetaqy jınaǵy qarajatyna qandaı klınıkada em ala alady

NUR-SULTAN. QazAqparat – Qazaqstandyqtar ózderiniń zeınetaqy jınaqtarynyń bir bóligine elimizdegi klınıkalarda qandaı em ala alady. Bul saýaldyń jaýabyn QR Densaýlyq saqtaý mınıstrliginiń Medıtsınalyq kómekti uıymdastyrý departamenti dırektorynyń orynbasary Gúlnar Sársenbaeva berdi, dep habarlaıdy QazAqparat tilshisi.

«Azamattar Qazaqstandaǵy kez kelgen klınıkada jáne stamotologııalyq qyzmetterdi qospaǵanda shet elderde barlyq qyzmetti ala alady. Biraq, bul rette kelisimshart jasalatyn medıtsınalyq uıymda atalǵan medıtsınalyq qyzmet túrin kórsetýge arnalǵan lıtsenzııa bolýy tıis», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Buǵan deıin Gúlnar Sársenbaeva jınaqtalǵan zeınetaqy qarajaty esebinen azamattar orfandyq aýrýlardy emdeý, Qazaqstan Respýblıkasynyń aýmaǵynda ornalasqan medıtsınalyq uıymdarda kórsetiletin stomatologııalyq qyzmetter (tisti protezdeý, ımplantatsııa), operatsııadan keıingi tyrtyqtar men týa bitken aqaýlardy túzetý maqsatynda rekonstrýktıvti jáne qalpyna keltirý operatsııalary (plastıkalyq), sondaı-aq mastektomııa, radıonýklıdtik jáne radıoıodterapııa, radıohırýrgııalyq emdeý (gamma-pyshaq, kıber pyshaq), protondy terapııa, oftalmologııalyq qyzmetter sııaqty qymbat turatyn qyzmetterdi ala alatyndyǵyn aıtqan bolatyn.

Sonymen qatar atalǵan tizbe halyqtyń qajettiligin eskere otyryp, ózgerýi múmkin.

Eske salsaq, 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy.

Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy. Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi. Sonymen qatar Zeınetaqyny paıdalaný boıynsha medıtsınalyq qyzmetterdiń tizimi bekitildi.