Qazaqstandyqtar zeınetaqy annýıtetin satyp ala alady

ASTANA. QazAqparat - 10 mıllıon teńgelik zeınetaqy jınaǵyn jınap alǵan qazaqstandyqtar zeınetaqy annýıtetin satyp ala alady. Bul týraly Parlament Májilisinde «QR keıbir zańnamalyq aktilerine saqtandyrý jáne saqtandyrý qyzmeti máseleleri boıynsha ózgerister men tolyqtyrýlar engizý týraly» zań jobasyn tanystyrǵannan keıin tilshilerdiń saýalyna jaýap bergen QR Ulttyq bank tóraǵasynyń orynbasary Janat Qurmanov málim etti, dep habarlaıdy «QazAqparat» HAA tilshisi.

«Eger adam zeınetke shyǵyp bara jatsa jáne onyń BJZQ-da jınalǵan qarajatyn keste boıynsha ala alady nemese ol zeınetaqy qoryndaǵy aqshasyn saqtandyrý kompanııasyna aýdaryp, zeınetaqy annýıtetin satyp ala alady. Bul jaǵdaıda saqtandyrý kompanııasy ony zeınetaqymen qamtamasyz etý jaýapkershiligin ózine júkteıdi. Demek, bul adam zeınetaqy annýıtetin satyp ala otyryp, ózin ómirlik zeınetaqymen qamtamasyz etedi», - deıdi Janat Qurmanov.

Zeınetaqy annýıtetiniń baǵasy týraly aıta otyryp, QR Ulttyq bank tóraǵasynyń orynbasary saqtandyrý kompanııalarynyń ózi mańyzdy esepterdi keltire alatynyn jetkizdi.

«Qazirgi ýaqytta zańnamadaǵy ózgeristerdi eskere otyryp, zeınetaqy qoryndaǵy bolýy kerek somanyń mólsheri áıelder men er adamdarǵa 10 mıllıon teńgege jetip otyr. Demek, eger ózińizdiń zeınetaqy qoryńyzda osy somany jınap alsańyz, siz zeınetaqy annýıtetin satyp alýǵa quqylysyz», - deıdi Janat Qurmanov.

Somanyń kóptigin Janat Qurmanov kompanııanyń ómir boıy zeınetaqyny ótep otyratynymen túsindirdi.

«Álbette, qazirgi ýaqytta az merzimniń ishinde osynshama somany jınap alýǵa kóptegen adamda múmkindik joq. Zeınetaqy annýıtetine qazir kóp adamnyń qol jetkize almaıtyny belgili. Bizdiń zań jobasy arqyly qazir kompanııaǵa qarjy aýdaratyn adamnyń aldanyp qalmaýy kerektigi boıynsha kepildik jumysyn sheship jatyrmyz. Bul kepildi Saqtandyrý tólemderiniń kepildik qory beretin bolady», - deıdi ol.

Qazirgi ýaqytta atalǵan málimetterge sáıkes, naryqta 32 saqtandyrý kompanııasy eńbek atqarsa, onyń 7-ýi densaýlyqty saqtandyrý baǵytynda jumys atqarady.

«Dál osy atalǵan kompanııalarzeınetaqy jınaǵyn júzege asyrý boıynsha jumys atqarady. Eger kompanııa bankrotqa ushyrap, beretin aktıvi qalmasa, bul tólemdi Saqtandyrý tólemderiniń kepildik qory bóletin bolady. Qazir ol qor jumys atqaryp turǵanymen, mindettemeniń úsh túri boıynsha ǵana jaýap beredi. Atap aıtqanda, avto kólik júrgizýshileriniń saqtandyrýy, tasymaldaýshylardyń jolaýshylar aldyndaǵy mindettemeleri jáne týroperatorlar men agenttikterdiń mindetti saqtandyrýy», - deıdi Janat Qurmanov.