Qazaqstandyqtar zeınetaqy alýǵa arnalǵan qujattaryn egov arqyly tapsyratyn bolady
«Aıta ketý kerek, zań jobasy áleýmettik-eńbek salasyndaǵy 36 memlekettik qyzmettiń 16-syn ózgertýge negizdelgen. Osy jobada biz azamattardyń HQKO-yna ótkizetin qujattar tizimin qysqartýǵa kúsh saldyq. Máselen, zeınetaqyǵa ótinish berý úshin buryn talap etiletin úsh qujattyń bireýin ǵana - jeke kýálikti kórsetse bolǵany. Al qyzmet kórsetý ýaqyty 7 kúnnen 1 kúnge deıin qysqarady», - dep túsindirdi zań jobasyn tanystyrǵan Densaýlyq saqtaý jáne áleýmettik damý mınıstri Tamara Dúısenova. Salalyq vedomstvonyń baspasóz qyzmetiniń habarlaýynsha, zań jobasyna sáıkes azamattar tek zeınetaqy emes, sonymen qatar jasyna baılanysty beriletin áleýmettik járdemaqy, jumystan shyǵyp qalýyna nemese bala baǵýǵa baılanysty áleýmettik tólemder alýǵa arnalǵan qujattardy da elektrondy úkimet arqyly rásimdeı alady. Úkimettiń biryńǵaı aqparattyq júıesin qoldaný qajetti qujattar tizimi men qyzmet kórsetý merzimin azaıtady. Sonymen qatar bir ótinish arqyly eki birdeı memlekettik qyzmet kórsetýge qol jetkizýge bolady. Máselen, 2016 jyldyń 1 qańtarynan bastap ótinish berýshi medıtsınalyq-áleýmettik saraptama bólimine habarlassa, oǵan sol jerde múgedektikti rastaý qujatymen birge memlekettik áleýmettik járdemaqy men arnaıy memlekettik ótemaqyny da berý josparlanýda. Aıta keteıik, áleýmettik-eńbek salasyndaǵy memlekettik qyzmetterdi ońtaılandyrý men avtomattandyrý máseleleri boıynsha ózgerister men tolyqtyrýlar týraly zań jobasy QR-nyń 7 Zańyna ózgeris engizedi.