Qazaqstandyqtar zańsyz alkogol ónimderin smartfonnyń kómegimen teksere alady
ASTANA. QazAqparat - QR Qarjy mınıstrliginiń Memlekettik kirister komıteti zańsyz alkogol ónimderin anyqtaý úshin jańa múmkindikti júzege asyrýda, dep habarlaıdy komıtettiń baspasóz qyzmetinen.
«2014 jyly alkogol ónimderiniń aınalymy turǵysynan zańnama ońtaılandyryldy. Alkogol ónimderiniń kóleńkeli aınalymyn azaıtý maqsatynda zań jobasynda smartfondar men planshetterdi paıdalana otyryp alkogol ónimderi naryǵynda sýbektilerge alkogoldik túpnusqalyǵyn derbes sáıkestendirý quqyqtaryn berý normalaryn engizý qarastyrylǵan. Zań jobasyn 2016 jyly iske asyrý josparlanǵan», delingen habarlamada
Bul máseleni sheshý úshin komıtet Wipon (Vaıpon) kompanııasymen zańsyz alkogol ónimderin anyqtaýǵa arnalǵan mobıldi qosymshasyn iske qosty. iOs, Android jáne Windowsphone úshin Wipon atty qosymshany júkteýge bolady. Aktsızdik markalar skanerlengennen keıin qosymshada alkogol ónimderiniń túpnusqalyǵyn týraly aqparat kórsetiledi. Barlyq yqtımal zańsyz taýarlar týraly málimetter bar skanerlengen derekter naqty ýaqyt rejiminde komıtetke jiberiledi, bul vedomstvonyń ishki resýrstar shyǵyndaryn azaıtýǵa jáne kiris derekterin óńdeý protsesterin ońtaılandyrýǵa múmkindik beredi. Wipon Dúnıejúzilik banki men Qazaqstan Respýblıkasy Bilim jáne ǵylym mınıstrligi birlesip júzege asyratyn tehnologııalardy kommertsııalandyrý jobasy sheńberinde qoldanylady. Servıs kóleńkeli ekonomıkamen keshendi kúres júrgizýge arnalǵan. Jaqyn arada Wipon dári-dármek, parfıýmerııa, turmystyq hımııa, azyq-túlik jáne basqa da tutyný taýarlary sııaqty ónimderdi tekserý úshin qoljetimdi bolady. Wipon qosymshasy paıdalanýshylar men óndirýshiler úshin tegin bolyp tabylady.
