Qazaqstandyqtar «www.egov.kz» portaly arqyly sotqa talap aryz bere alady
TANA. 21 qazan. QazAqparat - Búginde «elektrondyq úkimet»portaly arqyly salyq túrleri men aıyppuldardy tólep, anyqtamalar alyp, nekege turýǵa ótinish berýge bolady.
Sondaı-aq, onlaın tártibinde sotqa talap aryz bere alasyz, dep habarlaıdy QR Baılanys jáne aqparat mınıstrliginiń baspasóz qyzmetinen.
Talap aryzdy elektrondy nusqada berý múmkindigi QR Azamattyq protsessýaldyq kodeksi jáne «Aqparattandyrý týraly» QR Zańymen bekitilgen. Elektrondyq tsıfrlyq qoltańbasy bar jáne elektrondyq úkimet portalynda tirkelgen Qazaqstan Respýblıkasynyń barlyq rezıdentteri portaldyń kómegimen talap aryz bere alady. Ol úshin QR Joǵary sotynyń «Elektrondyq qyzmetter» bólimine kirip, arnaıy úlgini toltyrýy qajet. Jaýapkerdiń tirkelgen nemese turǵylyqty meken-jaıy boıynsha aýdandyq sotty tańdap, aryz mazmunyn, istiń dárejesin jáne QR Salyq kodeksiniń 535 babyna sáıkes bekitilgen memlekettik baj salyǵynyń kólemin kórsetý kerek. Talap aryz berý úderisi barysynda qoldanýshy Salyq kodeksine sáıkes memlekettik baj salyǵyn tóleýden bosatylǵan ister men talap aryz berýshilerdiń dárejesimen tanysa alady. Úlgini toltyrǵan soń talapker talap aryzǵa óziniń ETsQ-syn qoıady. Budan soń talap aryz sotqa jiberiledi.
Elektrondyq nusqada berilgen talap aryzdy sot tirkegen soń bes jumys kúni ishinde qarap, talapkerdiń «jeke kabınetine» aryzdyń qabyldanǵany nemese keıin qaıtarylǵany týraly habarlama jiberedi. Aryz keıin qaıtarylǵan jaǵdaıda, onyń naqty sebepteri kórsetiledi. Al, talap aryz qabyldanǵan jaǵdaıda, talapker tirkelgen azamattyq istiń nómirin alady. Sot qaraýyna alynǵan talap aryzdyń budan keıingi dárejesi týraly QR sot organdarynyń biryńǵaı avtomattandyrylǵan aqparattyq-saraptamalyq júıesinen (http://eaias.supcourt.kz ) bilýge bolady.
