Qazaqstandyqtar Vengrııada ótken kıkboksıngten álem kýbogynda 7 altyn jeńip aldy

ASTANA. QazAqparat - Qazaqstan quramasy Vengrııada ótken kıkboksıngten álem kýbogynda 7 altyn medal jeńip aldy.

WAKO-2016 týrnıri mamyrdyń 11-15-si aralyǵynda Vengrııa astanasy Býdapeshte ótken bolatyn. Álemdik dodada 24 eldiń 150-den astam sportshysy kıkboksıngtiń «K-1» jáne «fýll-kontakt» túrlerinen saıysqa tústi.

Qazaqstan sportshylary bul baıraqty básekede 7 altyn medal enshiledi. Máselen, týrnırdiń aqtyq synyna deıin alqynbaı jetken Ábish Qudaıbergenov qarsylasyn jaqtan uryp nokaýtqa jiberdi. Tarazdyq Ashat Jantursynov ta qarsylasyn esten tandyrdy. Al atyraýlyq Azamat Ótemisov fınaldyq kezdesýde qarsylasyn baýyrdan uryp búk túsirgen bolatyn.

Aıta keterligi, ótken jyly Dýblınde ótken álem chempıonatynda Qazaqstan quramasy altyn medaldan quralaqan qalǵan edi.