Qazaqstandyqtar úıde otyryp-aq jumysqa ornalasa alady
ASTANA. QazAqparat - Jyl saıyn elimizdiń eńbek naryǵynda 2 mıllıonnan astam qazaqstandyq alǵash ret jumysqa ornalasady ne bolmasa jumys ornyn aýystyrady. Bul rette jumys izdeýshilerdiń basym bóligi jumysty BAQ pen Internet arqyly derbes izdep, túıindemelerin ornalastyrý úshin qarjy shyǵyndaıdy. Tipti tanys-tamyr izdeıtinderi de barshylyq. Mundaı pikirdi «Eńbek resrýstaryn damytý ortalyǵy» AQ-nń prezıdenti Dáýlet Arǵandyqov bildirdi, dep habarlaıdy QazAqparat.
«Qazaqstandyqtardyń barlyǵy birdeı óz mamandyǵy boıynsha jumys taba almaıdy. Buǵan qosa, jumys berýshilerdiń barlyǵy da qajetti jumysshyny taba almaıtyndyǵy bar. Bul aqparat tapshylyǵynan oryn alatyn jaıt. Atalǵan máseleni sheshý úshin aǵymdaǵy jyly Elektrondy eńbek bırjasy iske qosyldy. Búginde bul resýrs búkil respýblıka boıynsha 61 myń jumys berýshi men 230 myń jumys izdeýshiniń basyn qosyp otyr. Osynaý elektrondy alańnyń arqasynda 126 myńnan astam adam jumys tapty. Elektrondy eńbek bırjasyndaǵy barlyq aqparat tegin, táýlik boıy jáne paıdalanýshy qaı jerde bolmasyn qoljetimdi», - dedi Dáýlet Arǵandyqov.
Onyń aıtýynsha, 2017 jyldyń qazanynan bastap bırja Astana, Almaty, Pavlodar jáne Shymkent qalalarynyń halyqty jumyspen qamtý ortalyqtarynda ilki joba retinde iske qosylǵan. Al 2018 jyldan bastap búkil Qazaqstan boıynsha biryńǵaı tsıfrlyq alań óz jumysyn bastaǵan.
Aıta keteıik, «Elektrondy eńbek bırjasy» portaly jumys berýshilerge kadrlardy tańdaýǵa, al jumys izdeýshilerge jumys tabýǵa kómektesý úshin quryldy. Portalda respýblıkanyń barlyq aımaqtarynan bos jumys oryndary jáne túıindemelerdiń biregeı bazasy ornalasqan.
Qazirdiń ózinde elektrondyq eńbek bırjasynda 45 jeke jumyspen qamtý agenttikteri, 4 gazet pen 6 ınternet-alańdar tirkelgen.
