Qazaqstandyqtar uıaly qosymsha arqyly dári-dármektiń baǵasyna shaǵymdana alady
QR Densaýlyq saqtaý mınıstrligi jarty jylda bir ret bólshek jáne kóterme saýda úshin dári-dármektiń shekti baǵasyn bekitedi. Bul dárilik zattar naryǵyndaǵy alypsatarlyqtyń aldyn alady jáne baǵanyń negizsiz ósýine jol bermeıdi. Mınıstrliktiń buıryǵyna sáıkes elimizde dárihanalardaǵy dári-dármektiń quny belgilengen shekti baǵadan aspaýy tıis. Árbir preparattyń baǵasy bólek jazylǵan.
«Qoǵamdyq monıtorıng jáne baǵany baqylaý úshin DARI.KZ mobıldik qosymshasy ázirlendi, ol arqyly ár adam dárihanadaǵy dári-dármektiń baǵasyn baqylaı alady. Baǵa negizsiz qymbattasa, qosymshaǵa shaǵym jazýǵa bolady. Shaǵymdy QR DSM Taýarlar men qyzmetterdiń sapasy men qaýipsizdigin baqylaý komıtetiniń aýmaqtyq bólimsheleri tekseredi.
Jyl basynan bastap DARI.KZ mobıldi qosymshasyna dárilik zattardyń bekitilgen shekti baǵasyna qatysty jeke tulǵalardan 191 ótinish tústi», delingen habarlamada.
Dárihanalarda dári-dármekke qatysty daýly jaǵdaılardy eskere otyryp, ákimdikterdiń janynan dári-dármektiń shekti bólshek jáne kóterme baǵalarynyń saqtalýyn tekseretin monıtorıng toptary quryldy. Sondaı-aq óńirler boıynsha dárilik zattardyń bar-joǵy jáne baǵasy týraly málimet usynatyn anyqtamalyq qyzmetterdiń (I-Teka, MPI, Farmgorodok, Gıppokrat, 103.kz, Bıosfera) aqparaty taldanady.
Taýarlar men qyzmetterdiń sapasy men qaýipsizdigin baqylaý komıtetiniń aýmaqtyq bólimsheleri QR QM Ekonomıkalyq tergeý departamentiniń qyzmetkerlerimen, sondaı-aq basqa da memlekettik organdarmen birlesip dárihana uıymdaryna dárilik zattar men jeke qorǵaný quraldarynyń, onyń ishinde maskalardyń baǵasyna tekserý júrgizedi.
«QR «Ákimshilik quqyq buzýshylyq týraly« kodeksine sáıkes, dárilik zattardy, medıtsınalyq maqsattaǵy buıymdar men medıtsınalyq tehnıkany kóterme jáne bólshek saýdada satý erejelerin buzǵany úshin aıyppul salynady. Jeke tulǵalarǵa – 70, laýazymdy adamdarǵa – 100, shaǵyn kásipkerlik sýbektilerine – 130, orta kásipkerlik sýbektilerine – 200, iri kásipkerlik sýbektilerine 1000 aılyq eseptik kórsetkish mólsherinde aıyppul tóleıdi.
Dárilik zattarǵa shekti baǵany kótergen barlyq fakti boıynsha qoldanystaǵy zańnamaǵa sáıkes jaýapkershilikke tartylady», delingen habarlamada.
Densaýlyq saqtaý mınıstriniń 2019 jylǵy 15 shildedegi № QR DSM-104 «Bólshek jáne kóterme saýdada ótkizýge arnalǵan dárilik zattardyń saýda ataýyna shekti baǵalardy bekitý týraly» buıryǵynda dárilik zattardyń shekti baǵalary kórsetilgen, ony QR DSM QKKB, «Dárilik zattar men medıtsınalyq buıymdardy saraptaý ulttyq ortalyǵy» saıttarynan, sondaı-aq QR Ádilet mınıstrliginiń Normatıvtik bazasynan tabýǵa bolady.