Qazaqstandyqtar úshin tanymal ári senimdi aqparat kózderi qandaı

NUR-SULTAN. QazAqparat – Qazaqstandyqtardyń basym bóligi teledıdarǵa senedi. Bul týraly Úkimet otyrysynda QR Aqparat jáne qoǵamdyq damý mınıstri Asqar Omarov aıtty, dep habarlaıdy QazAqparat tilshisi.

«Qazaqstandyqtar úshin tanymal ári senimdi aqparat kózderi qaısy degen máselege keler bolsaq, onda Internews in Kazakhstan derekteriniń statıstıkasyn mysal retinde aıtsaq bolady. Qazaqstandyqtardyń basym bóligi teledıdarǵa senedi – 58,1 paıyz, ekinshi orynda – ınternet saıttar (34,3 paıyz). Buqaranyń jartysynan kóbi memlekettik medıaǵa senedi – 51,4 paıyz, tek 9,6 paıyzy jeke adamdarǵa senedi», - dedi mınıstr.

Onyń atap ótýinshe, Memleket basshysynyń tapsyrmalaryn iske asyrý aıasynda mınıstrlik BAQ-tyń básekege qabilettiligin damytý jáne arttyrý boıynsha júıeli jumys júrgizip jatyr.

«2020 jyldan bastap aqparat salasyn damytýdyń 2020-2022 jyldarǵa arnalǵan ulttyq josparyn júzege asyrý boıynsha jumys júrgizilýde. Bul jospar memleket pen medıa salasynyń júıeli sheshimderin talap etetin BAQ salasyndaǵy ózekti máselelerdi sheshý maqsatynda ázirlendi», - dedi Asqar Omarov.