Qazaqstandyqtar úshin eń qoljetimdi TOR-10 avtomobılder
ASTANA. QazAqparat - 2018 jyldyń qańtar-mamyrynda Qazaqstanda 165,5 mlrd teńgege 20 620 jańa jeńil avtokólik satyp alyndy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«Mamyr aıynda jeńil avtokóliktiń ortasha quny 8 875 116 teńgeni qurady jáne bıylǵy qańtarmen salystyrǵanda, 14 paıyzǵa ósti. Otandyq zaýyttan shyqqan kóliktiń ortasha baǵasy 5 374 439 teńge somasynda qalyptasty», - dep atap ótilgen habarlamada.
Qańtardaǵy satylymdarǵa qaraǵanda, mamyrda bıýdjettik segmenttiń qysqarýy tirkelip, kerisinshe, qymbat kólikterdiń segmenti artty. Osy oraıda, qazaqstandyq naryqta 3,5 mln teńgeden arzan kólik modelderine suranys 28,7-den 13,5 paıyzǵa deıin qysqardy. Mamyrda avtonaryqtyń tórtten bir bóliginen astamyn (28,7 paıyzy) 5-7 mln teńge aralyǵyndaǵy avtomobılder qurady. Al bıznes-sanattaǵy kólikter (10-15 mln teńge) segmenti de 7,9-dan 20,5 paıyzǵa deıin ósti.
«Jalpy, 2018 jyldyń 5 aıynda qazaqstandyq naryqta suranysy joǵary modelder arasynda quny 3,5 mln teńgeden arzan kólikter basymyraq boldy. Olardyń úlesine satylǵan avtomobılderdiń 20,9 paıyzy nemese 4 302 avtokólik tıesili boldy. Odan keıingi orynda 20,4 paıyzdyq deńgeımen 5-7 mln teńgege baǵalanǵan kólikter shyqty. Al satyp alýshylardyń 19,6 paıyzy 3,5-5 mln teńgeni quraǵan avtomashınalardy tańdady. Sonymen qatar, atalǵan merzimde satylǵan kólikterdiń 16,6 paıyzy 7-10 mln teńge shamasynda baǵalanǵan», - delingen habarlamada.
Qańtar-mamyr qorytyndysy boıynsha qoljetimdigi joǵary modelderdiń reıtınginde otandyq jáne ımporttyq avtokólikter de ótim boldy. Baǵa jaǵynan 2,59 mln teńgeden bastalatyn Lada Granta-ǵa tańdaý kóbirek túsken.
Eń qoljetimdi avtomobılderdiń TOR-10 qataryna Ravon R2 (2,78 mln teńge), Ravon Nexia (2,8 mln), Lada 4x4 (3,11 mln), Ravon R4 (3,25 mln), Lada Kalina (3,34 mln), Renault Logan (3,55 mln), Ravon Gentra (3,73 mln), Lada Vesta (3,79 mln) jáne Lada 4x4 pickup (3,86 mln) endi.
