Qazaqstandyqtar úndi shaıyn ishýden álemde besinshi orynda
ALMATY. QazAqparat - Úndistannan eksporttalatyn shaıdyń 5 paıyzyn Qazaqstan tutynady. Bul týraly Úndistannyń saýda mınıstrligi janyndaǵy Shaı keńesiniń damý dırektory Sakır Hýseın aıtty.
Onyń aıtýynsha, jaqynda úndi shaıyn súıip ishetin qazaqstandyqtar úshin «Úndi shaıy» saıty ashyldy. Jańa portal shaıqumarlar men qarapaıym tutynýshylarǵa, bıznes-qaýymdastyqtarǵa arnalǵan. «Qazaqstandyqtar Úndistannan syrtqa eksporttalatyn shaıdyń 5 paıyzyn tutynady. Qazaqstan Úndi shaıyn tutyný boıynsha álemde Reseı, BAÁ, Ulybrıtanııa, Irannan keıingi besinshi orynda tur. Munda jylyna 12,61 mln kg shaı ımporttalady. Bir qazaqstandyq jylyna 1,5 kg shaı, kúnine 5-6 kese shaı ishedi eken», - dedi SakırHýseın. Jańa portal arqyly qazaqstandyqtar shaı salasyndaǵy sońǵy jańalyqtarmen, sapaly taýardy jetkizýshiler týraly aqparatpen tanysa alady.
