Qazaqstandyqtar tutynatyn energııadaǵy balamaly qýat kóziniń paıyzdyq mólsheri qandaı?

ASTANA. QazAqparat - Bul suraqqa búgin Ortalyq kommýnıkatsııalar qyzmetinde baspasóz máslıhatyn ótkizgen QR Energetıka vıtse-mınıstri Maǵzum Myrzaǵalıev jaýap berdi, dep habarlaıdy «QazAqparat» HAA tilshisi.

«2016 jyldyń nátıjesi boıynsha balamaly energııanyń úlesin 1 paıyzǵa jetkizgen bolatynbyz. Jalpy, 2020 jylǵa qaraı bul kórsetkish bizdiń boljam boıynsha 3 paıyzǵa, 2050 jylǵa qaraı 50 paıyzǵa jetedi dep oılaımyz. Osy jumystardy naqty jolǵa qoıý úshin eń bastysy aýktsıondy ádiske kóshýge kúsh salyp jatyrmyz. Nelikten? Sebebi, sońǵy 4-5 jylda balamaly energııanyń qundylyǵy 4-5 esege azaıǵan bolatyn. Sondyqtan, úlken iri kompanııalardy tartý maqsatynda Qazaqstanda aýktsıon jasaýdy josparlap otyrmyz. Ol tez jasalmaıdy. Bul - aldaǵy 2 jyldyń jumysy», - deıdi Maǵzum Myrzaǵalıev.

Eske sala ketsek, búgin OKQ-da QR Energetıka vıtse-mınıstri Maǵzum Myrzaǵalıev pen «KAZENERGY» qaýymdastyǵy tóraǵasynyń orynbasary Uzaqbaı Qarabalın 7-8 qyrkúıek aralyǵynda «EKSPO-2017» kórmesin qorytyndylaıtyn HІ Eýrazııalyq «KAZENERGY» forýmy ótetini týraly aıtqan bolatyn. Ol jıynǵa Birikkken Arab ámirlikteri, Islandııa, Bolıvııa, Grýzııa, Fınlıandııa elderi men Dúnıejúzilik munaı keńesinen ókilder keledi.