Qazaqstandyqtar túrmede otyrǵan alaıaqtarǵa 80 mln teńge aýdarǵan – elordada úkim shyqty
NUR-SULTAN. QazAqparat – Elordada túrmede jazasyn ótep jatqan azamat qylmystyq top quryp, qazaqstandyqtarǵa áleýmettik baspanaǵa qol jetkizýge ýáde etken. Sot ony jańa merzimge kesip, sybaılastarynyń biri bolǵan – áıelin bas bostandyǵynan aıyrdy, dep habarlaıdy QazAqparat.
Elorda sotynyń aqparatyna sáıkes, azamat S. 2017 jyly alaıaqtyq jasap túrmege túsken. Ol sol mekemede jazasyn ótep jatqan ózge adamdarmen birge sóz baılasyp, qylmystyq top qurǵan. Ári bul topqa bostandyqtaǵy jubaıyn tartqan.
Ol áıeline «Kredıtnoe tovarışestvo «Jılsotskredıt» JShS atty seriktestik qurǵyzyp, ózge sybaılastarynyń birin álgi seriktestikke quryltaıshy, taǵy birin azamattarǵa kompanııa qyzmetin túsindiretin menedjer etken.
«Kompanııa zańdy qyzmet júrgizetinine sendirý úshin turǵyndardyń áleýmettik álsiz býynyna tıimdi sharttarmen nesıe beretin tartymdy baǵdarlamalar ázirlegen. 2017 jyldan 2018 jylǵa deıin atalǵan tulǵalar Qazaqstannyń túrli óńirlerindegi sengish azamattardy jalǵan kompanııaǵa 124 560 teńge mólsherinde jarna salýǵa kóndirgen, olarmen túrli somalarda «depozıtke» aqsha salýǵa shart jasasqan. Azamattar alaıaqtardyń áleýmettik nesıe baǵdarlamasyna senip, aqsha salǵan. Al kompanııa olardy yntalandyrý úshin keıbirine depozıttik salymdary boıynsha azdap syıaqy berip otyrǵan», - delingen sot habarlamasynda.
Alaıaqtardyń tuzaǵyna uzyn-yrǵasy 200-den astam azamat ilinip, jalpy 80 mıllıon teńgeden astam qarjy quıǵan.
«Nur-Sultan qalasy, Almaty aýdandyq №2 sotynyń úkimimen azamat S. 13 jylǵa bas bostandyǵynan aıyryldy. Qylmystyq istiń qalǵan fıgýranttary 6 jyldan 7 jylǵa deıin merzimderge kesildi. Úkim zańdy kúshine engen joq», - dedi qalalyq sottan.
