Qazaqstandyqtar Túrkııa halqyna kómek retinde 5 mln dollar jınady
ASTANA. QazAqparat – Qazaqstandyqtar zilzaladan zardap shekken Túrkııa halqyna kómek kórsetý úshin 5 mln dollar jınady. Bul týraly elshilikte ótken brıfıngide Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı aıtty, dep habarlaıdy QazAqparat tilshisi.
«Zattaı kómekten bólek, Qazaqstan turǵyndary aqshalaı kómek kórsetti. Osy ýaqytqa deıin jer silkinisinen zardap shekkenderge arnaıy ashylǵan resmı shotqa shamamen 5 mln dollar aqsha tústi», - dedi Ýfýk Ekıdjı.
Sonymen qosa, elshi Qazaqstan Úkimeti 1 mln dollar qarjylaı qoldaý kórsetkenin atap ótip, barsha qazaqstandyqtarǵa alǵysyn bildirdi.
Eske salaıyq, 6 aqpanda Kahramanmarashta magnıtýdasy 7 baldan asatyn eki jer silkinisi boldy. Jerasty dúmpýleri eldiń 10 provıntsııasynda, sondaı-aq kórshiles memleketterde, sonyń ishinde Sırııada da sezildi.
Prezıdent Rejep Taıyp Erdoǵan tabıǵı apat qurbandaryna baılanysty Túrkııada jeti kúndik ulttyq aza tutý jarııalady.
